話說無幾耐之前突發組遇上一宗撞車，起因係懷疑有私家車司機無讓路畀消防車，而結果喺十字路口「嘭」一聲撞咗，仲令西九龍有啲街道返工時間塞餐懵。
咁當然啦，有人嘅地方就難免有人傻的嗎，而人要做傻的嗎嘢，外人又好難制止嘅…
2019年12月24號，當香港警察話平安夜唔封路、唔站崗，難免就有人又以為可以違泊放題，兼係任意放題唔使本咁 (-_-)
事緣1429時嗰陣，一架隸屬灣仔消防局嘅泵車，喺要通過登龍街嘅時候，被一架揀正全條街最錯位置嚟違泊嘅七人車阻礙，轉唔到彎… （⊙＿⊙）..|.. 而且仲阻擋咗消防供水龍頭！
消防員叔叔就算幾好人，揀落車研究點樣可以通知返七人車司機移開架車。
但網民就利用香港近月嘅事調侃一番：「幫佢寫光復香港啦」、「堵路， 快call防暴」、「手足堵路，唔好咁揚」、「打三條九，話有人堵路，即刻有防暴到」…
講得最傳神就應該係呢個：
打九九九話有幾個激進暴力示威者，十零歲，唔知係邊度偷架車返嚟泊埋一邊唱歌同貼連儂牆
我包你杯麵都未熟已經成隊兵嚟現場
其實，政府某啲部門真係要認真諗吓「點解市民會咁睇低佢哋」
最後講句：眾所周知，過時過節一位難求，大家都唔會一見到違泊就鬧，但唔係所有地方都有條件容許違泊㗎！
1 Trackback / Pingback