【駕駛態度】泊車擺彎位窄路 旨在引眾人發怒?

喺無幾耐之前曾經寫文講過,喺尖沙咀亞士厘道有個好「聰明」嘅司機擺低咗一架七人車,然後走咗去…但又無留電話畀人知道,搞到阻到人都唔可以通知佢揸走架車,結果村巴塞喺彎位,半個尖沙咀西就咁被佢「買起咗」。

眾所周知,喺香港呢個地方,唔少人都係好「聰明」,所以阿寶真係好忙… (=_=)』

是咁的,喺香港島其實有個地方被一啲 巴膠 巴士界人士謔稱為「判官彎」――原因係嗰個位經常有一啲「聰明」司機亂咁泊車,搞到塞住啲「大車」就「買起咗條路」,而要驚動某個 自翊 被稱為「巴士判官」嘅 巴士佬做正義使者邀請一班「好人」去處理――佢寫信去區議會、混吉 運輸署、港島區交通部倡議嗰度加「雙黃線」,最後由佢「成功爭取」而得名――但奈何,香港人揸車視「黃線」如無物。

重點係…其實係連《警訊》都去過呢個「判官彎」拍片講「違例泊車」問題… (●+++●)y

其實講緊睇頭4分幾鐘咋

言歸正傳,可能嗰一帶比較近蘭桂坊,所以硬係有啲人劈低架車就趕住去「劈酒」、「劈女」…喺2019年11月4號夜晚就又有一個「聰明」司機做咗「阿寶」… (>_<)

(相片由「野原新之助隻寵物狗」提供)

大佬呀~你可能10月31號晚無得玩,搞到你「緊火」到好心急趕著「補返數」,但唔該搵返個好啲嘅位先至擺車啦!你泊到咁,巴士入唔到彎,跟著就由雲咸街一路塞返上去荷李活道…全體「陣亡」!

大家都知道喺中環好難搵到個正規泊位, 大家都唔介意對違例泊車「隻眼開隻眼閉」嘅…前題係你唔好搞到人哋吖嘛!

真係講起都嬲嬲豬… (>_<)

3 Trackbacks / Pingbacks

  1. 【駕駛態度】違泊都要揀啱位 咪要人哋X晒鬼 - 汽車台 HK Car Channel
  2. 停車走人留電話 咁畀號碼點樣打? - 汽車台 HK Car Channel
  3. 【駕駛態度】車泊站頭阻巴士 好彩你肯移一移 - 汽車台 HK Car Channel

Leave a Reply

Your email address will not be published.


*