近幾個月，唔少網民影到車身貼有 GoGoVan 標誌嘅客貨車或「五噸半」輕型貨車疑似幫 港共軍政府武裝衛隊 (即係大家已慣常稱呼嘅「黑警」) 運輸物資，甚至上星期有網民拍攝到數十隻 Green objects 由一部貼有標誌嘅「密斗」貨車躍下展開濫捕行動，
好多人基於政治取態急急腳話要罷用 GoGoVan、delete Apps，周圍問人「仲有乜嘢同類 Apps」。
有網民推介 Call4Van 呢個 Apps，但由於唔少人個腦袋十足有如「除了鐵路以外你們不可以有別的交通工具」── 除了 GoGoVan 以外沒有其他 Call 車 Apps，不論用家或司機一時三刻唔知 Call4Van 係乜嘢料子…… 甚至有啲唔知乜水話「Call4Van 都係藍絲嚟架，唔好裝呀」，我同編輯部成班兄弟姊妹睇到都唔知講乜好。
或者先重溫一啲相關嘅歷史。之所以搞到「除了 GoGoVan 以外沒有其他 Call 車 Apps」，乃因為自從 GoGoVan 出現並且普及之後，即使市場上仍然有電話 Call 台式服務與及其他同類 Apps，但香港人慣常「貨比三家」、甚至「疴尿隔渣」咁格價，見 GoGoVan 價錢低啲…… 久而久之就開口埋口「GoGoVan 啦」，並養大咗呢個 Apps 背後間公司。
跟住就要俾大家明白一個事實，不論「Call 台」還是任何一款 Apps，都唔係嗰部 客貨 Van 或「五噸半」嘅車主；司機亦唔係 Call 台或 Apps 背後間公司嘅員工。司機自己接咗乜嘢柯打唔駛同 Call 台或 Apps 背後間公司交代，不過 Call 台或 Apps 收到 軍政府 嘅租用柯打亦都會委派司機。即係話大家影到或 Share 嘅嗰啲硬照或影片，其實無辦法判斷到底係公司抑或司機接返嚟嘅任務。
「咁即係為 GoGoVan 開脫啫 !!!」唔好咁直咇腸先啦唔該 ……
我哋 汽車台 HK Car Channel 嘅特色之一就係講求「專業」兩個字 ── 熟悉運輸業生態先至講得出實情同去分析，唔係只顧「攞 soundbite」呃 Like 搏 Share 而亂寫一通。
講返正題。先撇除四個多月以來一切嘅政治因素與及各公司一直以來嘅政治取態，純粹講吓香港人最鍾意嘅錢嘅問題。
前段提到「GoGoVan 價錢低啲」…… 無可否認，同樣嘅路程，Call4Van 嘅報價確係略貴。再者，Call4Van 唔係「頭啖湯」兼無幕後金主供應銀彈谷宣傳，導致以程式安裝數量反映嘅潛在客戶數目、及參與嘅車輛數目都一定「低水」。引伸至在用家角度「貴又貴過人，車又少過人」，然後導致在司機角度「客又無、柯打又無」，於是乎坊間同業界都無太多人知道 Call4Van 呢個 Apps。
無錯，在消費者嘅角度價錢越平越好，但好可惜香港人一直以來都係唔會諗「司機食飯」嘅問題。或者講得更直接且「血腥」── 香港人唔會識得逆地而處同人諗，永遠要自己著數晒！
Call4Van 嘅報價之所以比其他 Apps 略高，就係顧及司機嘅收入。懶「公義」咁講，就係唔要司機做奴隸。雖然 Call4Van 的司機版 Apps 有分「免費版」同「收費版」，但「收費版」只係一如傳統 Call 台向司機徵收固定金額月費，唔會額外向司機抽佣。講到呢度，唔知過去一直貪平嘅各位會唔會諗到「人血饅頭」呢四個字呢喂 ?!
另外，Call4Van 唔會因為架車有無貼 Logo、甚至「全車 wrap 廣告」將司機分級接收訂單嘅優先次序 (越貼得多/大越先收到訂單)。更是系統內有「司機報站」功能，按客人訂車的上車地點遠近嚟「派柯打」。好處不單係唔會响司機群「製造特權階級」，仲有係响客人角度能夠縮短等候時間；更是司機有較大機會可以同區「接單」，減少不必要「吉車燒油」嘅開支。
也許呢期香港人個腦乜都「政治化」去判斷應否惠顧某啲商戶，但基於本台嘅「專業」原則，我唔會以做「黑警」生意或公司擁有人嘅政治立場去講，而係講更高層次同宏觀嘅角度。
有人認為 GoGoVan 背後係「紅色資本」所以唔應該幫襯，我就認為啱一半啦。
即係點？美心集團係港資加英資 (怡和) 啦……
再串咀啲，Alexander Dennis E500 雙層巴士係响珠海裝嵌車身，共产党 take parts of revenue。咁你係咪唔搭吖?!
GoGoVan 嘅「紅色資本」背景確係反映其政治取態與及所衍生嘅問題，但最大問題其實係一開始就採取「以本傷人」嘅手法，以壟斷市場為目標，當成功壟斷市場就開始各類剝削。唔止係司機受到剝削，創辦人林凱源臭串到叫人「揼晒部電話」，可以話係對香港人尊嚴嘅剝削。呢啲典型共产党嘅營商手段及引致嘅壟斷，响香港真係比比皆是，例如港鐵就是吧；揸車嘅，一街都係中石化油站，亦是如此。
姑且就當我哋同 Call4Van 賣廣告，但事實就擺晒出嚟。更是「政治化」咁講，香港人一直嘅貪小便宜心態，唔好話養出咗一啲商業壟斷嘅「怪魔」出嚟依家要承擔後果，淨係唔會諗「貨 Van 佬」嘅「食飯」問題，如今就要「買贖罪券」啦。拎咗咁多著數，你估唔 L 駛還呀！
下載 Call4Van (乘客版) Apps:
Google Play
iPhone App Store
下載 Call4Van (司機版) Apps:
Google Play
iPhone App Store 暫未有提供
後記：客貨車所謂「無貨載客取酬」嘅問題，其實我曾經响立法會質問「根據《道路交通條例》關於「貨物」嘅訂義係乜？」運房局同運輸署嘅官員都避而不答。
相反地，的士尾箱塞爆而尾冚閂唔埋根本就係犯法，
唔好話往常嘅「特區政府」為咗保住由譚惠珠衍生嘅利益而選擇性執法，家陣直情係「軍政府軍法管治」狀態，大家都係小心啲好喇。
Be the first to comment