【車壇隨手寫】「暴徒」扑警車？臨時演員都係演員

昨晚 (25Aug) 荃灣除咗有 黑警 開槍同「自然反應」腳踢街坊之外，尚有「暴徒」於眾安街扑爛一部 Benz Sprinter 519CDi 嘅車窗。

我哋見到呢啲畫面唔會好 high，但就不其然的福爾摩斯或柯藍上身，不過就唔係好多網民咁去考究「暴徒」是否臥底假扮，而係睇吓被仆嘅 Sprinter 到底係「新款」定「舊款」。

結果發現，今年5月19日一宗新聞，同一個車牌，同一個環頭牌……
三個月零7日(唔係三年零八個月)，斷估應該唔會咁快換車吧。就算換，都應該係換上「想放假揸歐霸」嘅 Iveco Daily 先係嘛。

咁即係噚晚被「暴徒」扑玻璃嘅嗰一部係「舊款」來的；同6月7日灣仔駱克道/軍器廠街交界嘅「汽油彈」係同一款車。翻查資料，呢批「舊款」Sprinter 519CDi 已經陸續到期準備淘汰，即係大家慣常講嘅「就嚟劏」。既然準備劏的話，扑爛又有乜所謂呢！而且，近兩個月，所有警車都裝晒鐵網，但噚晚呢部 AM6104 竟然無裝鐵網喎…… 我無嘢講

太多巧合因素同時存在，真係好難怪腦部運作正常嘅市民又再一次懷疑係自編自導自演嘅爛劇。

雖然本台 (連同 巴士台 HK Bus Channel) 嘅多媒體製作剛剛起步，亦真係 budget 唔係有限而係相當緊絀，但都仲知道周星馳名句 臨時演員都係演員 嘅真理，同埋知道道具組嘅專業水平相當重要，因為我哋唔會好似某啲洗腦訓練「條街無人識XX」，而係相信認真製作先至會得到讀者觀眾嘅讚賞。

但大家放心，我哋未登記政府註冊供應商，所以一定唔會幫呢啲黑社會政權拍嘢。