電動勞斯萊斯快過官方面世？

近年電動車已經佔領咗汽車領域幾乎每個品牌，傳統車廠都開始推出電動或者混合動力型號。奢華汽車品牌勞斯萊斯亦都唔例外，2018年時，時任 CEO Torsten Müller-Otvös 曾經講過電動車先係勞斯萊斯嘅未來。不過喺概念車 103EX 量產前，專門將古典汽車電動化嘅改裝商－Lunaz 就率先將兩款經典勞斯萊斯車型Phantom V幻影同Silver Cloud銀雲改裝成為電動車。

總部設於英國銀石嘅 Lunaz，團隊由曾任各大車廠高級工程人員組成。唔好以為Lunaz只係將呢啲老爺車嘅燃油動力系統直接改為電力驅動系統咁簡單，根據Lunaz所講，佢哋會對每部車進行3D掃描以及測量工作，以便喺更換同安裝電氣化系統之後，對車輛進行重新調教。

為咗保持Phantom V幻影原有優雅嘅古典氣派，所以外觀方面並無刻意變化，不過車身嘅塗裝採用咗上下部份分別名為Midland Gray和Cinereous Gray 兩種灰色嘅Two Tone顏色，令新車喺復古嘅外型基礎上仲可以展示出時尚感。

內籠方面，依舊延續咗Phantom V幻影經典嘅八座佈局：前、後排嘅大梳化分別可以乘坐三人，同時後排配有兩張獨立嘅折疊座椅。內籠裝飾嘅材料同配色都係由Lunaz嘅內部設計團隊精心設計，內飾整體採用咗同車身外觀互相呼應嘅大面積Argent Gray環保皮革包裹，為咗延續勞斯萊斯嘅奢華品質，就連地台腳墊都係用羊駝，即係草泥馬嘅毛定制。使用羊駝嘅毛據講係因為比勞斯萊斯原本採用嘅羔羊毛更加柔軟。

1961年勞斯萊斯Phantom V幻影上配備嘅膠木電話仍然保留喺電動版新車上，同時喺車門門把手上，亦加上咗特別嘅粉紅色裝飾。而鑲有實木裝飾面板嘅中控台都重新進行打磨，並且採用玫瑰金鑲嵌工藝進行修飾。

沿用復古嘅設計並唔代表呢部電動版新車無任何科技配置。Lunaz喺新車嘅後排安裝咗兩塊高清液晶顯示屏，並且配備咗多媒體娛樂系統，系統支援衛星導航同娛樂功能。

動力方面雖然廠方無公佈具體嘅數據，但有消息指純電動Phantom V幻影將裝配一個容量為120 kWh嘅電池組，續航里程估計超過480公里。而純電動Silver Cloud銀雲就搭載一個容量為80kWh嘅電池組，但由於車重量比Phantom V幻影輕，所以續航里程亦都估計喺480公里之上。

售價方面，純電動Phantom V幻影嘅價格由50萬英鎊起；而純電動Silver Cloud銀雲就由35萬英鎊起。第一批電動版勞斯萊斯Phantom V幻影同Silver Cloud銀雲只會限量30台，雖然廠方已經接受全球訂購，但Lunaz會供現有客戶以及世界知名嘅收藏機構享有優先購買權。