福田 (FOTON) 電動商用車車展 – 最新 eAumark 貨車及 eView 客貨車

電動車潮流唔止持續於私家車，商用車亦陸續有新猷。由仁孚旗下嘅仁田汽車所代理嘅北汽福田 (FOTON) 商用車正式加入「戰團」，推出全新 “e Aumark” 電動「五噸半」貨車，及 “e View” 電動客貨車。日前於馬料水香港科學園舉行車展，展出兩款三部新車。

“e Aumark” 電動「五噸半」貨車沿用一直在港銷售嘅 “Aumark” 貨車藍本，換上峰值功率 115kW / 扭力913Nm 嘅恆久磁電動摩打嘅驅動系統，與及寧德時代 OEM 嘅磷酸鐵鋰電池。儲電量81.14kWh，NEDC 續航距離約 310km。

「車身」方面，駕駛室「屋仔」改用窄身規格，與及由福田原廠安排裝嵌嘅全鋁合金「密斗」貨廂。令到全車淨重 (Unladen weight) 僅約3400kg，因而載貨量 (Payload) 達到2噸。

代理強調 e Aumark 因為電力消耗成本與柴油嘅差距，加諸省卻使用尿素，行駛成本可節省近八成。不過，續航距離能否滿足運輸行業嘅需要就有待考證。

車展中展出嘅兩部 “e View” 客貨車，分別在於單排座椅兩座位及雙排座椅五座位 (歐洲習慣分別稱為 Full panel van 及 Combi van )。

動力系統同樣為恆久磁摩打，峰值功率 85kW / 扭力 290Nm 。電池同是寧德時代 OEM，儲電量50.23kWh，NEDC 續航距離約 310km。

除咗續航距離，叉電耗時亦係電動車嘅關鍵因素之一。e View 「快叉」(20% – 80%) 預計40分鐘；至於 e Aumark，代理表示「快叉」需時約 70-80 分鐘。由叉電衍生嘅配套問題，代理亦提供多種功率叉電機組架設服務。

車展會場亦同時展出兩款柴油規格嘅 Aumark 貨車，分別為廠方最新推出嘅 10噸規格，與及裝配上運輸署最新「人籠」座椅法例要求嘅密斗連尾板 5.5噸規格。

無論對柴油版本或電動版本有興趣，都可以聯絡代理查詢。順帶一提，兩款電動貨車/貨VAN 都可以申請「新能源運輸基金」，不過車價「面數」點都要俾咗先。