新一代日產Serena日本發佈

正當香港 Nissan 日產代理仲力推緊「e-Power」電氣化油電動力 MPV Serena 嘅時候，日本廠方就喺噚日為日本市場率先帶嚟新一代 Serena 車系。

第六代 Serena 以 Big、Fun、Easy 三大元素作設計，車身長、寬、高分別為 4,690mm、1,695mm 以及1,870mm，軸距為 2,870mm。外型上似乎都同上代分別唔算好大，車窗線條仍然採用類似設計，除咗車身腰線同裙腳線條有所改變之外，最大分別一定係極大嘅 V 型鬼面罩，同兩側嘅三點式 LED 頭燈組。頭燈組左右兩側向 A 柱伸延，同 A、B 柱之間嘅雞翼窗連接。側面睇，有啲似萬事得Biante 嘅設計，好唔好睇就見仁見智喇。

至於車廂裏面最大嘅改變一定係中控台，新一代Serena 改用屏幕式儀表板，中控台上亦有 12.3 吋大型屏幕，令到駕駛資訊可以更清楚顯示。而懸浮式中控台上嘅冷氣面板，除咗保留旋鈕之外，都改用輕觸式設計。而最大特色就一定係將原有嘅波棍改為類似巴士式嘅波掣按鈕設計。

日本版喺動力方面，保留 2.0L 自然進氣汽油引擎，以及全新嘅 1.4L「e-Power」電氣化油電動力設定。2.0L 汽油引擎型號採用前輪驅動佈局，搭載 CVT 無段變速波箱提供 150 匹馬力以及20.4 kgm 扭力。按 WLTC 標準下每公升汽油可行駛 11.6 公里。

而「ePower」採用嘅 1.4L HR14DDe 三缸自然進氣引擎，以 98 匹最大馬力同 12.5 kgm 最大扭力為電動摩打提供電力。摩手就擁有最大 130 匹馬力以及 32.1 kgm 最大扭力。根據 WLTC  標準平均油耗表現可達到每公升行駛 20.6 公里。

新一代 Serena 車系亦引入 ProPilot 2.0 駕駛輔助系統喺 e-Power Luxion 型號，ProPilot 2.0 駕駛輔助系統可以喺時速 40 公里以上，唔切換行車線情況下，司機可以無須手握軑盤，車輛都可以自動行駛。而喺手握軑盤同按下確認鍵後，除咗可以自動切線外，更可以做到按導航目的地設定駛出支路離開公路。另外更有「車輛遙控進出停車位」功能，為車主提供更高便利性。360 度 Safety Assist 全方位駕駛輔助系統，亦係 Serena 全車系嘅標準配備，當中包括前車預警、側向駕駛輔助以及後方停車輔助，加強全方位嘅駕駛安全。