「香港車仔展2022」有啲咩睇？

我哋汽車台除咗會拍片試駕，同埋寫有關本港交通嘅文章之外，其實都有留意有關汽車嘅模型商品嘅

由香港模型車資訊平台《手推車》策辦嘅「香港車仔展2021」去年成功舉辦後，今年再接再厲，喺9月22至25號期間，喺荔枝角 D2 Place ONE舉行「香港車仔展2022」大型車仔主題市集。舊年活動嘅 Post 可以睇返︰

今年「車仔展2022」將會展覽多個國際同香港本地原創品牌嘅模型車，包括：MiniGT、Model 1、Tarmac Works、INNO64、Popsible & Ubivox、Good Speed、Era Car、Daniel & Co、Siku、Monster Energy、Peako、Schuco & Spark、鴻興玩具，同埋BM Creations。會場仲會有多款模型車仔全球首發，以及原創場景同人仔展出。另外曾為巴士車身同商場外牆廣告設計嘅本地著名漫畫家林祥焜先生，亦同《手推車》合作，為大會設計主題繪畫。

先帶大家睇睇各參展商戶嘅展品先︰

MiniGT 最新 1:64 模型樣辦－Mercedes Benz EQS、Mercedes Maybach S600

Marconi di Bologna 機場內嘅林寅堅尼 Huracan RWD 飛機領航車 1:64 模型

MiniGT 與香港林寶堅尼合作推出嘅 Urus－Unlock the Road Hong Kong 特別版 1:64 模型

MiniGT 分別為香港慈善機構 playright 及東莞社福項目舒心驛站籌款而製作之特別版模型，所有收益不扣除成本會全數捐贈

MiniGT 最新監修中嘅全新本田 Civic Type R FL5 1:64 模型

由 MMModel 製作嘅 1:64 鑊場單車同單車舖場景模型，非常吸引筆者眼睛

Hobby Japan 最新推出四款 1:64 模型，包括三款頭文字D AE86 及土屋圭市職人版本田 NSX

Tarmac Works 推出「海賊王」系列車仔，除咗車仔迷外，相信動漫迷都會有興趣

會場限定版本嘅「海賊王」VW Type II 車仔，連同另外一套六款車仔以套裝購買

Peako Model 為「香港車仔展2022」推出兩款豐田 MR2 SW20 Revision 4 會場限定 1:64 模型

友台「地板油」將豐田 Echo 再次帶上高峰，BM Creations 都計劃推出四門版 Echo 1:64 模型車，而且有原版同改裝版

當中 Model 1 攤位可以話稍稍有別於其他主力生產跑車模型嘅商號，佢哋嘅中重型貨車模型像真重度高。上年仲係灰模階段嘅百福汽水貨車，較早之前已經喺市面推出咗，而喺展會上更加提供特價之餘，仲會附送汽水盤、汽水樽同蒸餾水樽一套。

於會場 Model 1 攤位以 HK$199 購買原價 $298 嘅百福汽水貨車，將會獲贈汽水盤、汽水樽同蒸餾水樽一套

專注生產商用車模型嘅 Model 1 亦於今次「車仔展」上推出凌志 LF-A 超級跑車，而會場首賣嘅係未上色版本。

除咗玩具廠商同代理嘅攤位外，會場中央仲有車仔市集，檔主會出售私人收集同珍藏嘅車仔。上年筆者都喺市集嘅檔口入面搵到喜出望外嘅舊款車仔！

有興趣嘅朋友不妨帶埋一家大細，喺今個週末嚟到 D2 Place ONE 二樓 The Space 展場參觀下丫！未完㗎！行完 D2 Place ONE，行埋去隔籬嘅 D2 Place TWO 啦！地下嘅「微影車仔展」除咗有巴士台介紹嘅會場限定版巴士玩具模型之外，亦都有港幣 $200 一套嘅會場限定A+B+C 套裝，同埋海外系列嘅「孖寶套裝」。

於 D2 Place Two 地下嘅另一部份展覽「微影車仔展」上，多款海外版車仔以「孖寶套裝」方式發售

而最吸引筆者嘅，係喺今次展會預訂，由 BM Creations 生產嘅三菱第三代 Lancer C60 香港的士。喺90年代初同而家嘅四座位的士係兩個唔同嘅概念。今時今日嘅「小露寶」係四座位，但係空間非常闊落；二90年代初嘅四座位的士，大家只會諗到空間狹窄，行李再載空間唔多。雖然近期都有日系小型的士以混能概念攻港，但係當年嘅 Lancer 的士絕對係香港經濟起飛下，的士需求大增下嘅產物。