TESLA 壞尾 cam 頭冚鎖被美國政府要求召回近 50萬部車輛

【綜合外電報導】 美國國家公路交通安全管理局 (NHTSA) 日前宣佈要求 Tesla 召回美國國內近50萬部 Model S 及 Model 3，主要原因係發現尾箱冚開關可能導致視像鏡頭故障損壞，與及頭冚鎖安裝位置失準可能自動「彈冚」，增加安全風險。安全局同時進一步調查 “Autopilot” 輔助駕駛系統衍生嘅行車安全問題，不排除要求 Tesla 擴大召回範圍及修正問題。

NHTSA 於美東時間2021-12-30 發出通告，指2017至2021年期間生產約36萬部 Model 3 尾箱冚嘅電線線束鋪設存在瑕疵，可能隨著開關次數增加而損毀導致視像鏡頭無法正常操作傳送映像予司機；與及連同近12萬部2015-2020年期間生產的 Model S 頭冚鎖具疑安裝位置準確度欠佳，未能鎖緊而使行車期間嘅氣流可能在毫無預警下「自動『彈頭冚』」。Tesla 向安全局承認收到後視鏡頭映像問題 2301宗保用申索及601宗投訴。但否認召回項目有引致有死傷嘅嚴重意外嘅報告。

另外，中国朝廷有關運輸部門亦因相同原因，要求特斯拉召回 19,697辆 「型号 S」 和 188,044辆「型号 3」(包括 35,836辆进口的洋貨)

Tesla 表示會為召回車輛進行電線線束加強保護維修工作，與及重新安裝調校頭冚鎖具，所有零件及人工全免。

另一方面，NHTSA 繼續調查 Tesla 廠方設定中控台大屏幕容許行車期間使用遊戲機功能「打機」，與及 “Autopilot” 輔助駕駛系統以至其他可能影響行車安全嘅功能，但根據美國全國廣播公司商業頻道 CNBC 報導，Tesla 對 NHTSA 僅表示認同要關閉「打機」功能。

至於香港方面，截至撰稿前，運輸署網站「汽車安全召回資訊」網頁並未有相關嘅公佈。

今次 Tesla 召回嘅瑕疵，根本係低級錯誤。尤其是頭冚鎖具，更可謂是絕不能接受嘅QC問題。至於尾箱冚電線束，從下面相片所見，懸空部份都幾長，而且好明顯掂到門鉸

是否成因，當然未能肯定。純粹經驗之談，但實際都可能係。

聲明：香港嘅 Tesla Model 3 同 Model S 嘅車主們請自行考慮是否就今次美國及中国嘅召回與廠方聯絡。本台僅作報導及評論，不對任何故障問題承擔責任。