拍攝涉及現代時空背景電影、電視劇集嘅時候，劇情入面要出動到汽車係好正常，而劇情入面嘅汽車要掛返個「車牌」亦好正常。
通常拍戲用喺劇情入面嘅「車牌」有時都係隨便揀選，而同時就算拍攝時嗰個「車牌」未有被登記使用，運輸處亦當然可以拎嚟分配畀新登記嘅車輛。
只不過…劇情又會唔會令現實中見到嗰個「車牌」時另有感受呢？不妨拎呢一個諗諗：
JG633有乜特別呀？
〔睇埋落去啦！〕
汽車台提提大家，香港電台其中一套頗受觀眾欣賞嘅節目叫《火速救兵 IV》，當中有一集題為《守．破．離》，當中有一幕係講及一架雙層巴士剷上行人路、撞到簷篷，引致多人受傷嘅劇情。
呢一幕係2018年5月19~20號，由Aria Studio喺火炭路利達工業中心外面拍攝，大家埋嚟細心睇睇…
呢一架雙層巴士原本係新巴 #3306，喺呢一幕劇情就模擬返2017年9月22號城巴 #8515 喺深水埗長沙灣道東行與欽州街交界發生嘅嚴重交通意外。
而劇情入面嘅巴士，劇組安排咗嘅「車牌」就係「JG633」——根據行車證資料，現時使用「JG633」呢一個「車牌」嘅車輛係喺2018年7月30號作首次登記，究竟係咪拍攝之後被運輸處再次發牌？定係本身原有牌主換咗車？呢層就無去考究喇！
唔知現時用緊「JG633」呢一個「車牌」嘅車主同司機，對於「JG633」呢一個「車牌」曾經係一架「剷上行人路撞低好多人嘅巴士」，有無覺得「大吉利是」呢？
近月香港電台不斷刪除之前曾經放上互聯網嘅影片，但香港仍然有一班有心人嘗試保留呢啲影片，例如今次講到嘅《守．破．離》，大家趁仲有得睇就去睇吓喇！
至於2017年9月22號城巴 #8515 喺深水埗長沙灣道東行與欽州街交界發生嘅嚴重交通意外，大家亦可以去返巴士台嗰邊睇返當日所拍攝嘅現場情況：
22/9 長沙灣道交通意外現場最新情況
Posted by HK Bus Channel 巴士台 on Friday, 22 September 2017
講到巴士意外，究竟消防救援人員會點樣進行拯救行動呢？大家又可以睇吓巴士台較早前嘅一啲相關報道：
如果大家見到自己個「車牌」出現喺戲劇入面嘅話，又會唔會沾沾自喜或者「X」一聲呢？
Be the first to comment