「零智」司機無視「讓線」 巴士煞唔切掣撞凌志

2021年5月2號下晝大約1點半，九巴1架行緊10號路線返緊彩雲嘅富豪超級奧林比安型10.6米版本雙層巴士（車隊編號：ASV91，車輛登記：LR7875），去到衙前圍道同城南道交界時，1架由城南道駛出嘅凌志轎車未有跟從地面「讓線」標記，直接駛出衙前圍道，導致被巴士攔腰撞到。

由於現場報稱多人受傷，消防派出多架救護車以及輔助醫療裝備車到場，而警方亦一度封閉衙前圍道1條行車線。

車禍擾攘大約半個幾鐘，現場交通一度擠塞。