揸 TESLA 出銅鑼灣更加方便 – 禮頓中心「目的地充電站」正式啟用

電動車已成不可逆轉嘅世界潮流，香港作為全球 Tesla 比例最高嘅城市之一，而且數量持續攀升，即使有其他牌子加入戰團爭奪市場，但 Tesla 於香港嘅領導地位始終無法動搖。有見及此，Tesla 香港繼續增建「目的地充電站」及超級充電站，擴充充電站版圖。

作為一個正職喺銅鑼灣返工嘅人，今日一如往常咁泊車返禮頓中心停車場之際，慣性泊上6樓嘅我即時俾所見嘅情境嚇親。原來屬於希慎興業旗下利園區嘅禮頓中心停車場6樓已經搖身一變成為「Tesla 專區」，一行超過20個車位已經全數劃為Tesla 專用泊位並全數裝上Tesla 目的地充電站 Destination Charger，方便一眾Tesla 車主返工同購物時可以為其愛驅叉電。

以現場所見全數目的地充電站已投入使用，泊位及牆身均油上及釘上Tesla 專用嘅標記。（利園區內之Tesla 超級充電站 Super Charger設於利園一期停車場B3樓）

禮頓中心停車場收費為：每 30分鐘 $14（星期一至日）。泊車優惠：凡於利園區商場（利園一至六期、希慎廣場、利舞臺廣場、禮頓中心、希慎道壹號 (I.T HYSAN ONE) 及利園區其他商舖(蘭芳道 25號或白沙道 12號)）之商戶及食肆以電子貨幣及八達通消費滿：$200 （星期一至四 (公眾假期除外) ）；$300（星期五、六、日及公眾假期） 即可獲3小時免費泊車優惠。

與此同時， Model 3 及 Model Y 繼 4 月之後將再一次減價。根據香港海關「汽車公佈零售價」公告及計算後「一換一」嘅車價，Model 3 SR+ 由 HK$341,200 降至 HK$320,800，「頂級版」Model 3 Performance 及 Model Y Performance 更「大劈價」逾一成，分別由 HK$440,335 減至 HK$387,875 及 HK$487,205 減至 HK$431,950。

雖然車價可謂相當吸引，加上有更多充電站，但順便提醒大家買咗 Tesla 都要保持良好嘅駕駛態度，駕駛安全是不分車種的。同埋順帶一提，我作為經常出入禮頓中心停車場嘅司機都想特別提醒一吓大家，上落呢個場嘅技術同判斷力要求相當之高，就算運用 Tesla 嘅有嘅科技都未必可以輕鬆應付（大家睇吓啲彎位幾多人簽咗名留念就知啦）。