豐田推出高性能版 GR Corolla

豐田（TOYOTA）旗下嘅 Gazoo Racing 高性能民用車系，繼 GR Supra 同 GR 86 之後，舊年推出過小型掀背車 GR Yaris，靠住殺食嘅外型同提升嘅性能，喺全球迷倒唔少車迷。不過 GR Yaris 嘅 1.6 公升引擎提供嘅 257 匹馬力，對於部份人嚟講都仲係未夠！豐田北美汽車分公司就喺當地時間噚日，公佈推出新一款由 Gazoo Racing 加持嘅街道跑車－GR Corolla。

GR Corolla 嘅外型比 Corolla Sport 更具侵略性。全新設計嘅前泵把、外拋沙板設計、車頂尾翼、車尾擾流擴散器等，都可以提升行車時空氣動力學嘅表現，而且車身嘅導流孔亦能為引擎同煞車提供更加好嘅散熱效果。至於18 吋黑色車軨，同埋賽車版嘅碳纖維車頂除咗為外觀加分外，亦都可以減輕車身重量。

豐田 GR Corolla 使用源自 GR Yaris 嘅 1.6 公升直列三缸渦輪增壓引擎，最大馬力上調到 300 匹，而峰值扭力亦提升到 37.7kgm。六前速 iMT 棍波波箱加上 GR-FOUR AWD 四輪驅動系統，可以喺按唔同路況選擇 60:40、50:50 同 30:70嘅前後動力分配，並且喺 Torsen 限滑差速器配合下，令每個轆都可以有可靠同最佳嘅抓著力。

車廂入面，除咗換上三幅式軑盤之外，亦都有 12.3 吋全數碼儀表板，波棍後面有圓形旋鈕可以選擇 Normal、Sport，以及 Track 三種駕駛模式。前排座椅當然換成兩張 GR 運動化桶凳啦！而中控台嘅多媒體系統，同埋Toyota Safety Sense 3.0（TSS 3.0）主動安全系統都係標準裝備。如果選購嘅係賽道版嘅話，除咗上而提及嘅碳纖維車頂之外，波棍頭上仲會有豐田章男嘅「Morizo」簽名㖭～