日產Note ePower的士公佈售價

日產（NISSAN）Note ePower 的士喺過往幾個月，都不斷俾網友野生捕獲。喺較早前進行車型檢定後，終於喺今日公佈價單。

$182,062 嘅香港海關汽車核准公布零售價，比私家車版嘅 Note ePower 貴咗大約五萬蚊（未連首次登記稅），設備上除咗私家車版都有嘅自動頭燈、安全氣袋、合金鈴、後波 Sensor 等等之外，當然都仲包括埋的士喺營運上必需嘅咪錶啦！不過的士版本嘅原廠保養期就同私家車有所不同，只有 12 個月，而私家車版就有 36 個月。

日產 Note ePower 的士除司機外，全車可以接載四名乘客。兩廂式嘅設計令到車身體積減少，全車長度只有4,055 mm，行李箱容積可能因而減少，但係喺狹窄嘅街道上面短小嘅車身就更見靈活喇！

有人可能會問，呢款日產 Note ePower 的士係「入電油行電」，油耗同力水上面會唔會同石油氣或者氣電混能嘅的士差好遠。日產 Note ePower 的士採用嘅 EM47 交流摩打雖然只有 116 匹馬力，比氣電混能嘅的士嘅 135 匹喺數字上略為遜色，但係 1220kg 嘅淨重，同埋電動摩打可以「即踩即有」嘅 28.6kgm 扭力，都足以彌補同應付香港各種嘅路面需要。而根據WLTC標準嘅耗油量係27.8 km/L，比氣電混能嘅的士19.4km/L 仲要低一節！不過又咁講，而家車用石油氣價錢係專用氣站都只係 $5.8/L 左右，但電油價錢就算用車隊卡減足六蚊都仲要$16.5/L。到底行電油嘅 ePower 混能喺油價高企嘅香港下用嚟做的士，會唔會有優勢呢？可能就要等我哋有機會試車，或者各位司機大佬出車之後用時間去證明喇！

講到錢，不如都順手睇吓其他牌子嘅的士價錢丫！比亞迪第二代 e6 純電動的士喺截稿之前暫時都未有公佈售價，而私家車版嘅價錢係 $278,000。好多的士大佬都話佢慳油又淨嘅「小露寶」豐田（TOYOTA）Comfort Hybrid 嘅香港海關汽車核准公布零售價係 $328,900，但係要上「的士色」仲要另加 $10,000。仲有喎，如果要連埋原廠 Service Package 仲要加多 $8,700，加加埋埋即係 $347,600，比日產 Note ePower 的士足足貴多接近一倍。唔知各位的士車主又會點揀呢？

＊本文相片由SK Cheung拍攝及授權使用。