汽車台收到讀者來相，話2022年3月31號下晝喺中環見到有啲司機無視交通標誌嘅指示，揸私家車駛入咗「禁止車輛駛入」嘅道路：
根據相片，位置應該係德輔道東行過咗雪廠街路口，現場路口就明顯豎立咗「禁止車輛駛入（專利巴士例外）」嘅交通標誌，但見到有私家車司機無理會呢個限制照樣揸車入去。
先唔好理…
「點解咁啱呢兩個違反交通標誌嘅司機都係揸Tesla？」
汽車台就覺得：
與其淨係批評，就不如教育
所以汽車台喺呢度想同大家講解返：
- 其實德輔道東行由畢打街路口開始係除咗專利巴士之外禁止其他車輛駛入，如果要由德輔道去金鐘，就要先揸入遮打道，再經美利道出金鐘道。
- 如果遇上公眾假期，遮打道被列做行人專用區嘅日子，由於封閉遮打道會令由雪廠街駛出嘅車輛無法好似平時咁駛去干諾道轉向東行，所以會指定喺公眾假期放寬雪廠街到金鐘道一段德輔道東行嘅除咗專利巴士之外禁止其他車輛駛入限制，容許雪廠街駛出嘅車輛右轉入德輔道。
- 至於德輔道西行，其實早喺銀行街路口就已經係除咗專利巴士之外禁止其他車輛駛入，由於一路再向西行去到租庇利街之前嘅幾個路口都係唔可以轉入德輔道西行，變相即係由銀行街去到租庇利街嘅德輔道西行一直都係「專利巴士專綫」，其他西行車輛就要行皇后大道。
雖然話現場路面無劃到相關嘅道路標記，只不過咁：
以上講嘅限制係已經「種晒牌」喎！
大家揸車嗰陣真係唔好行錯入去呀！
會有警察叔叔擺檔派「牛肉乾」㗎！
（見過，真係見過！）
Be the first to comment