豐田發佈新一代 Noah / Voxy 七人車

繼本田早前發佈新一代 Stepwgn 之後，豐田（Toyota）日前亦响日本發佈新一代 Noah。中型七人車市場嘅「戰火」陸續擴大！

剛過去嘅1月13日，豐田發表新一代中型MPV－Noah 及姊妹車系 Voxy。

廠方指新車採用咗「TNGA」架構下嘅 GA-C MINIVAN 平台底盤結構，車身體積亦有所增長，長度及軸距維持今代4695mm 及 2850mm，闊度增加至1,730mm，高度增加70mm 至1,895mm。

外形設計大致保留上一代風格，但將A 柱三角窗面積擴大、C柱側窗線條及尾燈大幅修改，放棄過去嘅垂直設計，改用類近 Alphard / Vellfire 嘅橫幅式燈組。

動力方面，新一代 Noah 同 Voxy 將會沿用 RAV4 嘅 2 .0L 直四自然吸氣引擎驅動頭軸，最大馬力 170hp、扭力 20.6kgm；波箱配上「Direct Shift-CVT」波箱，設有 10 個預設比例「波檔」+/-波功能。另外當然唔少得混能版本，仍然沿用 1.8L 直四引擎 + 95PS 電動摩打嘅配搭，綜合動力輸出 190hp /33.2kgm。仲有 E-Four 四驅版本，加多一個有 41PS 輸出嘅後置摩打。以 WLTC 標準測試耗油量，電油版 15.1km/L，混能版23.4km/L。

車身高度同闊度增加，車廂當然比今代寬敞。廠方設計座位佈局有六座、七座、八座，與及Welcab 福祉版本。

六、七座版嘅中排備有兩張附有腳托嘅大班椅，而且設有暖氣功能。中門離地140mm，另可加裝伸縮式踏板方便長者及小童。尾門設有「高度電控」功能，可以根據需要調整開啟高度，以便响例如室內停車場而高度受限嘅情況下仍然可以開啟擺放物件。

新車新科技方面就有「Toyota Safety Sense」主動安全系統；可以偵測汽車、單車、行人嘅PCS 預警式煞車防護系統；DRCC 全速域定速跟車；LTA 車道循跡輔助等輔助駕駛系統。如果香港代理無習慣性「非洲規格」主動、或因運輸署Type approval 程序被動「閹割」的話，應該都會响輸港型號上出現。

新車預計最快二月下旬抵香港，估計引入嘅會係七或八座位版本選擇，詳情有待代理公佈。