【新車速報】全新 豐田 Toyota Aygo

我哋嘅靚女主持 Momo 走佬 負笈到英國後，好快手就睇中咗豐田 Aygo 作為日常代步車。豐田 Aygo 車仔細細又慳油，加上同標緻 (Peugeot) 107、雪鐵龍 (Citroen) C1 共用平台開發，所以喺歐洲非常暢銷！

日前，海外媒體發佈咗新一代豐田 Aygo 測試車嘅最新諜照，新車估計會喺今年之內亮相。Aygo 作為豐田攻佔小型家庭車市場嘅型號，未來可能順市場需求推出混動版，以提升市場嘅競爭力。

講返新一代 Aygo，由圖中所見，新車外觀採用豐田最新嘅家族面譜作為設計理念，同時亦都會保留Aygo X Prologue 概念車嘅設計元素。新車基於最新嘅 GA-B 平台打造，沿用兩廂式緊湊型掀背小車嘅設計，切合時下歐洲市場需求。

動力方面雖然未有官方公佈數據，但根據現有相關資料分析，1000cc 嘅三氣缸引擎版本將會較先推出，而Hybrid 版本同 48V Mild-Hybrid 版本相信都會出現。而按歐洲市場對環保方面嘅殷求，推出純電動版本嘅機會都相當之高！

有消息指新一代 Aygo 會喺東歐捷克廠房生產，初期會有五前速手波，或者X-Shift自動波版本，並且會提供多達八款青春鮮艷嘅顏車車身俾準車主選擇。

雖然 Toyota 响香港有如 CCTVB 慣性收視，甚至有如宗教咁受盡「車迷」膜拜，但又香港普遍車主喜好總要「大件夾抵食」，加上所謂環保政策造成嘅市場因素，應該都唔駛旨意呢款車會响香港出現。

我哋靚女主持 MoMo 暫別 HK Car Channel 同 HK Bus Channel，佢仍然會以「駐英特派員」繼續為「汽車台」同「巴士台」提供各類資訊！。佢另外開設咗個人 YouTube 頻道 – MoMo House UK。大家不妨支持下，亦睇吓佢今次買車嘅經過。



買豐田，Uncle Lim 有無發癲 ?? 咁又無喎，只係提佢呢部 Aygo 唔預可以經常走大長途，就算偶爾上 Motorway 千祈唔好飛車，一來係「無可能」挑戰到佢 113mph on M25 嘅記錄 _{(叻喇、勁喇….. 超…….)}，二來係 Motorway 影快相未必有提示。