福士 (Volkswagen) Caddy 多用途車系响香港嘅普及程度縱未算「瀕危物種」，但客觀上確係「少數民族」，事關一來受到「別出心裁嘅法例」所限，柴油引擎版本只能以輕型貨車登記，即使唔介意「年年驗身，令你放心」當作私家車之用，總會嫌棄「只得」五座位；而在商用車方面，又會認為「貨籠」細，運載量唔及同廠嘅 Transporter 車系或同級車款，彷彿有點「高不成低不就」嘅格局。不過…..
或者先了解 Caddy 車系嘅來由。福士車廠由1979年開始推出「農夫車」第一代Caddy，及後响1995年推出嘅第二代，廂式車身設計登場。再到2003年推出嘅第三代，正式出現一體化結構車身，除咗載貨，並有七座位私家車版本，正正式式成為一款多用途車系。之後第四代，Facelift、提升機械性能，响歐洲受到不同用家垂青，即使係商業用途亦非常廣泛。
Photo by: Jacky Lim
今次「新車速報」測試嘅第五代 Caddy ，福士車廠响舊年11月响歐洲正式推出，香港市場同樣因為法例同政策，延至此刻才正式登場。
今代 Caddy 嘅車架仍然沿襲自香港車迷熟悉嘅 Golf 七代開始出現嘅 MQB platform，延長軸距及增高。而相比上一代，除咗引擎、波箱之外，機械上最大變動在於後懸掛，由上一代嘅葉片彈簧改為扭力桿配圈形彈弓，乘坐舒式程度大大提高，在商用角度而言，貨物運載更穩定。
呢部 Caddy “MAXI” 屬於五座位版本，採用 2000cc 柴油引擎，峰值扭力高達320Nm，相比排氣量相近嘅電油引擎高咗起碼50%，而且响1600rpm 全面爆發，已可預計「起圍」反應非常敏捷。配搭濕式離合器七前速DSG波箱，「油渣死忠」嘅阿Lim 試駕後表示……
香港汽車市場仲有另一個怪現象，就係道聽途說、人云亦云。好多「意見」指 DSG 波箱唔夠可靠，但綜觀好多研究分析似乎同你隻「黃金右腳」有關多啲…… 正經啲講，如果 DSG 波箱真係有問題，福士車廠早就放棄唔再用啦！
前段提及，响外國，Caddy 車系頗受歡迎，用途亦相當之廣泛。當然，除咗因為有香港車主「你哋唔恨得咁多」嘅油渣偈7座位，可謂多咗一項市場優勢，仲有唔少物流、工程行業都鍾情於Caddy，貪其輕巧靈活，足夠裝載需要嘅物品，又能駛入橫街窄巷，或遠達郊區農田都通行無阻。仲有，响德國、美國、台灣更有用嚟做的士。
Photo by Jacky Lim
雖然本港代理亦有提供電油版七座位嘅選擇，但用家可能會認為電油引擎規格嘅性能唔啱心水。或者嘗試思量一下，真係七人車，你又有幾可真係坐足七個人??
至於商業用家，大可認真留意一下，Caddy Maxi 嘅「貨籠」空間足夠擺到一個標準卡板4呎高嘅貨物。
如果衡量過自己嘅業務運載需要，Caddy 相對較輕嘅車身淨重，可能同你再慳唔少燃油開支。所以話，放下成見，你會懂得欣賞 Caddy 嘅輕巧別緻與實用兼備。
全集影片，已經上載到 HK Car Channel 的 YouTube 頻道。
睇完記得點擊 訂閱，與及「撳鐘仔」以便可以隨時知道有新影片上架。
規格資料簡介
型號：Volkswagen Caddy V “Maxi”
引擎型號：VW EA288 evo
形式：直列四氣缸，共軌燃油噴注，渦輪增壓連中冷器柴油引擎。符合 Euro 6d 環保標準
排氣量：1,968cc
最大馬力：122Ps/2750-4250rpm
最高扭力：320Nm/1600-2500rpm
變速箱：DQ381 濕式雙離合器 七前速 DSG
驅動型式：前輪帶動
制動系統：ESC 四輪碟式制動，附ABS。另備 TCS 循跡修正，EDL 電子限滑差速
車身體積 (長x闊x高)：4853x1855x1853mm/h；軸距2970mm
售價：HK$249,800 (包括首次登記稅)
備註：以上資料僅供參考。所有規格以生產商 Volkswagen AG 及代理商 Scania (Hong Kong) Limited 公佈為準
鳴謝：
Volkswagen Commercial Vehicles – Scania (Hong Kong) Limited
特別鳴謝
華記膠輪電池公司
Ooh La La Printing and Production Limited
Fleet-1 Service Centre
Be the first to comment