【收臂啦你！】吊臂勾斷電纜 香港電車停駛

2021年7月9號08:58，消息指有1架吊臂車喺軒尼詩道由銅鑼灣向西行駛，懷疑因為未有妥善收好吊臂，去到波斯富街交界、天樂里交界、北海中心對開合共3個地點，吊臂懷疑勾到香港電車嘅架空電纜，但涉事吊臂車司機懷疑根本一直都無留意到自己搞到咁大件事，繼續揸車去中環方向。

香港電車嘅電纜損毀後垂吊在半空，來回方向電車服務因而嚴重受到影響，以下路段暫停服務：

• 介乎金鐘至北角（來回方向）
• 跑馬地圈

事發後，香港電燈以及香港電車公司工程人員到場閂電掣搶修。警方港島區交通部警員為工程車開路趕去事發現場，務求儘快搶修；亦有交通警員熱心咁一直沿路來回提醒仲喺電車站等車嘅市民「無電車搭」。

其中喺軒尼斯道波斯富街路口，嗰度嘅電纜受損後下垂，香港電車嘅工程人員企上流動工作平台車搶修，由於嗰度嘅電纜垂得比較低，貼近雙層巴士車頂，有交通警員在場協助「睇位」。

警方正調查附近一帶閉路電視，調查涉案吊臂車去向。無獨有偶嘅係，今次嘅事發地點包括港島區交通部測試「智能交通執法機械人」嘅地點，而號稱嘅測試咁啱就號稱喺2021年6月30號完結，1個星期多啲啲就咁啱發生今次事故——究竟係咪咁好彩數呢？