豐田皇冠 (Toyota Crown)，唔少人嘅印象只係的士。「皇冠的士」的而且確深入民心。但皇冠車系一直以來都係豐田車廠旗艦級豪華房車，只不過由1971年至1995年期間嘅S60、S80、S110、S120、S130系，廠方提供多個級別嘅車身、車廂設備配搭選擇之外，還會有一個規格版本可以適合用作的士，直至1995年推出 Crown Comfort 才「分道揚鑣」。以皇冠車系用作的士嘅地方唔止香港，日本本土亦然，仲有新加坡。中國第一個出現的士呢種服務嘅城市廣州，「皇冠」亦係主力「開國功臣」車款之一。
下左 S120 | 下中 S130前期 | 下右 S130後期
雖然响香港出現過嘅「皇冠」車系(唔計 Crown Comfort，因為根本係另一個型號)，大多數都係的士，但亦有唔少私家車，我哋記憶 (主要係 Uncle Lim 同 Benny 叔叔啦，點解？大家明就得啦) 有 Super Saloon 版本，亦有頂級最豪華嘅 Royal Saloon。所知嘅車主除咗私人之外，尚有駐港日本企業，與及香港政府。
今次 HK Car Channel 節目裡面嘅呢部豐田皇冠，屬於廠方稱為第七代嘅 S120系，响1987年出廠嘅 Royal Saloon規格。車主 Terence 透過車會組織協助由日本二手車商購入，然後赴運嚟香港，完成海關嘅手續及通過運輸署驗車領取到牌照。
唔少人見到「古董車」三個字，總聯想到價值非凡嘅高級豪華房車，或是性能卓越嘅超級跑車，因而可能對於呢部1987年嘅「的士」感到莫名其妙，想不通車主為何購入「的士款私家車」。
事實上，用金錢衡量呢部「皇冠」嘅價值當然唔算好高，但正如每個人總可能响屋企收藏一兩件「唔值錢嘅『舊垃圾』」，背後一定有原因所以「唔捨得掉」，可能係家人留下嘅、可能係小孩時擁有至今、可能係記錄某個人生階段嘅事情、可能係……. 呢啲原因都不能用金錢衡量。的確，車主Terence同豐田皇冠之間有一些因由將佢哋連結埋一齊。
可能只搭過「皇冠的士」嘅你，响今集節目可以見識一吓 Toyota Crown 到底可以有幾豪華因而成為豐田車廠嘅旗艦級車款。
仲有，平常講揸車未必夠佢拗嘅阿Lim，今集竟然嗌投降唔坐司機位……
全集影片，已經上載到 HK Car Channel 的 YouTube 頻道。
睇完記得點擊 訂閱，與及「撳鐘仔」以便可以隨時知道有新影片上架。
1 Trackback / Pingback