寶馬發佈全新電動SUV－iX

喺11月11號，寶馬（BMW）發表咗由概念車 Vision iNEXT 進化而為嘅全新電動 SUV－iX。新車會由下年開始，喺寶馬位於德國巴伐利亞丁戈爾芬（Dingolfing）嘅工廠開始生產。

寶馬喺發佈資料中指出，iX 仍然處於「量產開發階段」，大約仲需要一年時間先可以正式上市，但資料中亦都交代咗新車動力系統同電池細節嘅端倪。

全新嘅 iX 採用寶馬最新電動車專用平台開發，採用鋁合金同碳纖維車架設計。另外亦包括擁有寶馬最先進嘅自動駕駛系統，行車電腦處理感應鏡頭嘅數碼圖像能力，比之前嘅電動車款高出20倍以上。而系統嘅硬件同軟件都支援5G物聯網功能，令廠方透過收集駕駛者嘅駕駛習慣，從而改善自動駕駛同自動停車功能。

寶馬 iX 採用第五代 eDrive 電動摩打，比同廠小車 i3 嘅摩打更加精良，而且尺寸更細，功能亦更細膩。底盤下藏有 100kWh 嘅電池模組，為前後軸兩個電動摩打提供電力。寶馬表示，兩個摩打一共提供超過 500bhp 馬力，令 iX 由 0-100km/h 加速可以少於五秒。

全新設計嘅電池模組喺充滿電之後，續航里程可達 605 公里，比起 Facelift 嘅小車 iX3 仲要長氣。iX 嘅電池喺 200kW 速度充電下，喺40分鐘內就可以充滿 80％ 嘅電量。如果採用傳統掛牆式 11kW 充電器充電，就可以喺 11 個鐘內將電池完全充滿。

尺寸同技術規格方面，廠方就無詳細透露，但就表示新車軸距為 3000mm，而車長同車寬度會同 X5 相若，而高度就會同 X6。

除咗 iX 之外，寶馬亦同時發佈咗名為 Definition CE 04 嘅電動電單車。電單車改良自2017年發佈嘅概念車 Concept Link，而家已經處於將近量產嘅階段。喺設計上，Definition CE 04 特別針對城市環境嘅實用性，包括低矮而且扁平嘅傳動系統同組件，令車身重心更穩定嘅同時，亦都節省咗更多空間去容納頭盔等嘅物件。廠方暫時仲未公佈續航數據，但就透露每日平均騎乘 12 公里嘅鐵騎士，將會係佢哋嘅目標客戶。