豐田大玩回憶殺！死場副線 Scion 復活 竟然喺美國本土砌出日本神級「Kei Truck」

日本車壇巨頭豐田（Toyota）2026年11月10號喺北美市場掟咗個震撼彈，宣布原本 2003 年創立、但喺 2016 年已經「摺埋」入歷史博物館嘅年青人潮流副線嘜頭「Scion」正式翻生，以「Scion by Toyota」嘅全新姿態重出江湖。最令人意想不到嘅係呢個昔日主打平價跑車同埋個性揭背車嘅嘜頭，復活竟然唔係玩「電氣化跑車」，而係將日本街頭巷尾最常見、極具東瀛平民色彩嘅「Kei Truck」（日本微型小貨車）搬去美國本土生產，推出萬眾期待嘅全新話題之作——2028 年款「Scion Kei-01」。消息一出，即刻喺美國車迷之間引起極大迴響。

講起 Kei Truck 呢種四四方方、車頭扁平嘅搵食小貨車，去過日本旅遊嘅人都一定唔陌生。多年嚟，美國有大批車迷對呢類日本 Kei 車「恨到流到一地口水」，但無奈美國聯邦政府嘅安全法規同埋俗稱「雞稅」嘅入口關稅極之嚴苛，入口水貨 Kei 車隨時會被海關充公甚至夾硬砸爛，搞到班美國車迷得個吉。呢次豐田睇準呢個市場缺口，索性「自己車自己造」，將日本大發（Daihatsu）極之成熟嘅皇牌微型小貨車底盤（即 Hijet Jumbo 兼 Toyota Pixis Truck 嘅血統）引入美國，仲決定直接喺美國印第安納州嘅豐田廠房進行當地裝配，務求繞過美國嘅進口限制同埋法規嘅地雷陣。

根據廠方發布嘅初步規格資料，呢架被命名「Kei-01」嘅微型小貨車，身形真係細到可以用「袖珍」黎形容。車身闊度得 5 呎，全長亦不過 11 呎。如果攞香港人熟悉嘅私家車做對比，佢嘅長度比起豐田 Corolla 房車竟然仲要短足足 4 呎。正因為有咁誇張嘅迷你尺寸，令到呢款微型小貨車喺狹窄路面行駛、捐窿捐罅或者喺掘頭巷掉頭嗰陣，靈活度簡直爆燈，猶如大細路玩緊遙控車咁輕鬆寫意。

雖然外表睇落去似乎細細粒冇乜料到，但佢載重能力絕對唔惹小，車尾貨斗嘅載重極限高達 600 磅，日常拎嚟運送一下少少重物、工具或者小型貨物可謂綽綽有餘。

好多人以為呢類搵食車入面一定係簡陋到絕嘅齋版配置，但豐田呢次喺人性化設計上可算落足心機。車廂之內並非清一色嘅硬膠死位，有返晒基本嘅掣仲裝返隻 mon，座椅竟然支援前後調校以及椅背挨後功能，唔同身形嘅駕駛者都可以搵到舒服嘅坐姿，唔使成個機械人咁直挺挺坐住揸車。座椅背後，廠方亦好貼心預留咗少少空間，方便司機隨手擺放隨身背囊、文件或者用索帶固定瑣碎雜物。最令東瀛車迷津津樂道嘅係，廠方為咗保留最原汁原味嘅日本風味，新車竟然堅持維持「右軚」嘅設定，去到美國就成個美國郵政派信車嘅經典格調即刻返晒嚟。

至於機械規格方面，Scion「Kei-01」同樣麻雀雖小、五臟俱全。引擎艙入面藏咗一副 660cc 嘅3汽缸輕量化引擎，仲配搭無段變速波箱（CVT）。最正嘅係新車標準配置埋四輪驅動（4WD）系統，平時喺一般乾爽路面行駛以慳油行先，一旦遇到雨天路滑、泥濘山路甚至落雪結冰嘅惡劣環境，司機只要輕輕撳個掣就可以將四驅系統啟動，爛路照樣輕鬆行過去。

除此之外，貨斗設計亦完全複製咗日本「Kei Truck」精髓，3面欄板都可以隨時「啪低」，令整個貨斗平台變成100%平坦嘅平面，無論用唧車定係人手搬貨上落都極之方便。

不過，世事往往無完美，呢場東瀛微型貨車美國夢背後，其實亦存在唔少現實嘅妥協。為咗能夠合法喺美國路上行駛而唔使跟足私家車果套極之昂貴同埋嚴苛嘅撞擊測試法規，豐田巧妙咁將「Kei-01」歸類落美國聯邦法例所指嘅「低速車」（LSV，Low-Speed Vehicle）。換句話講，「Kei-01」嘅最高極速要被車廠用電子系統嚴格限制喺每小時 25 英里（大約相當於時速 40 公里）。

正因為有呢個速度限制，新車喺推出初期並唔會直接擺上陳列室畀普羅大眾隨便買返屋企，而係主力透過特定「車隊試驗計劃」推出，重點攻陷美國國內大學校園、大型工業廠房、度假村、農場或者商業園區內部物流短途運輸市場。

按照豐田最新規劃，呢架話題十足嘅 Scion「Kei-01」預計會喺 2027 年下半年正式投入生產，並且被當做 2028 年款新車推出市場。雖然時速 25 英里嘅極速對於鍾情速度感嘅美國公路狂迷嚟講可能完全唔夠喉，但對於一班恨玩「Kei Truck」恨到幾乎要入住麻省麥克林醫院（McLean Hospital）嘅美國本地用家，以及需要搵返1款高靈活性、極致慳位工作車嘅商業機構嚟講，呢款「Kei-01」絕對係近年少見、既實用又誘人嘅話題神物。豐田呢次將已故潮牌 Scion 翻生，首炮唔走尋常路，選擇咗向日本次文化嘅「Kei 車」致敬，究竟呢個策略能否成功喺北美掀起一股平民微型車熱潮，確實令人拭目以待。