UBER 香港七宗罪之「第一宗罪」白金、鑽石級司機一定好高質？

Uber 將司機分成藍級、金級、白金級、鑽石級。淨係睇啲名，尤其是「白金級」「鑽石級」，乘客會唔會自然覺得，呢啲司機應該高級啲、穩陣啲、服務好啲？

但正如銀行信用卡有金卡、白金卡，航空公司會員都有唔同嘅等級咁，即例如國泰航空馬可孛羅會就有綠卡、銀卡、金卡、鑽石卡。問題係，金卡、鑽石卡，係咪就代表呢位尊貴嘅會員嘅人格、修養夠高質？

根本上要 Qualify 到 GCP 甚至 DCP 嘅關鍵只係需要有錢又捨得使，飛得多、搭得密就得。甚至有做過地勤、空姐/空少、CS 都應該見識過，金卡會員隨時串過碼頭咕喱，DCP 嘅「格」可以衰過巴士佬成日講嘅「鹹魚」。

既然航空公司會員級別都唔等於乘客質素，Uber 司機嘅白金級、鑽石級，又憑乜自然被理解成「高質司機」？

按 Uber 自己公開講法，要升上白金級，指定嘅三個月期內儲到 800 分就得。計返數即係平均每日要儲到十幾分。即係話全職做，或就算唔係「12碼」，都起碼要一至五食晒早、晚繁忙時段，接到幾張 3 分、4 分嘅單，仲千祈唔好做埋 KAYGO 同其他 APPS，先至得。

即係話，白金、鑽石所反映嘅，根本就唔係乘客直覺以為嘅「服務水平」，而只係個司機嘅工時、接單係咪願意配合平台玩法任勞任怨 (甚至任X？)。

掉返轉，最低級而乘客睇唔到嘅藍級，係咪就代表個司機無質素？假設一個本來 11.75 年嚟白金級甚至鑽石級嘅全職司機，因為私事，或者係俾警察放蛇搞到一兩個月無開工，跌返落去變返藍級。佢係咪差嘅司機吖？

又或者儲到 300 分嘅金級，乘客睇到級數，係咪就代表佢一定差過白金級，或者一定好過藍級？可以話 Uber 用咗一套似乎極容易令人誤會嘅命名，令乘客自然地將級數腦補成質素高低。

一般而言，乘客最直接感受到嘅「司機得唔得」，應該係識唔識路、識唔識變通。例如由高鐵站入屯門，司機收到料「三號幹線往荃灣近南昌站有交通意外」塞車，如果只靠 GPS 嘅就隨時一路排隊塞；如果識路，應該搵路出渡船街再上西九龍走廊。對乘客而言，兩者感受差好遠。但 Uber 個白金或鑽石級司機，唔好意思，個 APPS 係冇證明佢係咪有呢啲嚴格講「職業司機必須存在嘅技能」。

更重要係，呢套分級唔止係「名牌」，Uber 自己都聲稱，高級別司機(可能)有較高獲派單 priority，亦有額外功能，例如由「全盲盒」變成「半盲盒」。去到呢度，分級就唔再只係面子問題，而係直接同司機喺平台內部會被點樣對待綁埋一齊。

講到底，Uber 呢套司機分級，根本唔係反映司機嘅質素，可以話只係 identify 全職 vs 兼職，與及「聽教聽話」成績表。既然同質素無關，乘客就應該會轉移去另一個所謂制度上面，所指嘅係你落車之後唔一定要俾，但如果個司機唔知點樣黑你憎就一定會俾一星嘅「星級評分」。

不過，如果個司機專心揸車而木口木面，係咪就係無禮貌？急剎一下，會唔會其實係避貓避狗但你睇唔到，然後俾一星、揀「無禮貌」或「急剎」評語，個司機可能收到警告，卻連交車 cam 片上去求平反嘅機會都無。你手上嘅嗰粒星，又真係有幾可信？

即係點？留意「第二宗罪」。

警告：嚴禁政治上腦「幫滴滴、高德，或者任何中資平台抬轎」，或者認為收咗周國強、伍海山、鄭敏怡……嘅錢。本網站所有主理人員自出娘胎以來未有從事過的士行業。