「黑的」點止揀客拒載濫收車資

近日由「地理位置極度偏僻兼欠缺交通配套」嘅郵輪碼頭延伸出的士嘅服務質素問題，再「引爆」根本上已經長年累月地存在嘅「黑的」種種惡行，而焦點集中於「冚旗」拒載、揀客，「開天殺價」濫收車資之類在中国流行的社交網站小紅書廣泛流傳的不法行為，但有一種莫講話訪港遊客 (不論國籍) ，就算本港市民都難以察覺的違法所為有可能肆虐，就是疑似干擾、改裝收費咪錶濫收車資。

呢個問題其實小弟，以至本台各主要成員都留意咗好耐，只不過各人都少搭的士，或是會搭的士但上咗車都未必有特別留意，並因此無刻意去搜證。不過，近月持續發現有唔妥，其中一次更成功「有圖甚至有片有真相」

目前法例訂明，新界的士首2km 收費 HK$23.5，但相片清楚見到咪錶顯示行駛里程 2.0km 時嘅收費是 HK$26.90，即係已經「跳」咗兩次 (2km 後每200m 增收 HK$1.7，直至 HK$74.5)。

再睇埋影相前嘅錄影，咪錶顯示行駛里程在大約1.7km 至 1.8km 時就「跳」第一次。相對驗車時嘅要求最早「跳」第一吓嘅里程係1985m 再早咗最少100m。即係有足夠並合理嘅理據懷疑呢部的士嘅咪錶曾經做過手腳。

所謂「改錶」其實流傳咗好多年。歷年來執法部門多次查獲。犯案手法好多種，例如响機械式咪錶時期，由最簡單嘅「放呔氣」~ 車呔充氣低於車廠/輪呔廠建議壓力，甚至更換較細輪呔，令到「跳錶」距離低於實際行駛距離。

從呢個表應該更加清楚乜嘢一回事。簡單啲講，假設部的士原本應該裝設 195/65R15 輪呔，行走200m 車轆轉動103次 (2000÷1.935)，2km 即是1,033次；換上 195/60R15「薄呔」，滾動圓周少咗59mm，令到 200m 嘅實際轉數變成106次 (2km = 1066次)，但咪錶本身嘅設定就係在第1033轉「跳」第一吓、接續每103次「跳」一吓，GOT IT?! 而「打氣低於規格要求」亦達到同樣效果，只是差距可能無咁大。

到電子咪錶出現後，呢啲手法當然繼續，但因為電子咪錶後來再加咗印發收據功能而有乘客向當局舉報，執法部門拉人封艇之餘，運輸署亦收訂法例及發出驗車指引，規定的士必須使用車輛規格訂明嘅輪呔尺寸，驗車時帶動咪錶運作嘅車軸上嘅輪呔亦必須根據車輛生產商訂明的充氣壓力。

雖然無辦法再「換薄呔」作弊，但充氣嘛….. 驗完車攞到合格紙之後咪出去放呔氣囉！雖然咁做會增加燃料成本同加快輪呔損耗，但對於司機嚟講「入氣錢多得幾多吖」「條呔係車主嘅，關我叉事！」，所以呢種手法依然普遍。

針對輪呔呢啲「雕蟲小技」之外，過去亦有不法之徒真係有如改裝咪錶。响機械錶嘅時期，就有將安裝於車底嘅傳感器「做手腳」，目的都係加快「跳錶」速度。之後到電子咪錶出現，更有警方曾經破獲車主/司機响錶板下面暗角，例如極力子踏板左側安裝暗制以便「人手操作」，甚至有破獲犯罪集團真係拆開咪錶改裝。當年的士咪錶嘅封印只係壓花鉛粒，要冒充絕對輕而易舉，甚至有印象疑有運輸署職員提供鉛粒壓模參與其中 (頭盔：GOOGLE 廢廢哋，唔花時間摷陳年新聞，所以「疑」)。運輸署現時以貼有編號標貼嘅索帶，其中因由該是這宗案件。

撇除「放呔氣」，表面上已經難以作弊。但咪錶運作情況乘客都難以即時監察，加上車資 vs 車租 vs 牌價 係有直接關係，總有業者試圖以身試法，所以有理由懷疑「改錶」情況一直存在。直到近年，有咪錶供應商推出顯示屏顯示行駛里程嘅新產品，表面上可以予乘客即時監察，但就以文章前段「有圖仲要有片有真相」反映，似乎有的士業界仍舊「話之」。

除咗業界嘅劣根性之外，根源問題其實都係响運輸署方面。事關根據《道路交通 (車輛構造及保養) 規例》(Cap. 374A) 第43條 _{(係呀，又係接近40年嚟無與時並進嘅374A呀！)}，法例規定的士咪錶嘅運作原理依然係「連接車轆運轉」，雖然已經唔俾改薄呔，放呔氣可以抵賴「唔知道可能摻到釘漏氣」，但始終只係依賴車轆運轉提供嘅數據，仍然有漏洞可以作弊。

其實响外國，包括小弟必定引用嘅例子 ~ 新加坡，的士咪錶已經有採用另外兩種「嶄新」技術。一種係循車輛監察電腦 (OBD) 擷取數據，另一種當然就係 GPS。

前者好處係低成本，容易執行。依家唔少私家車車主安裝嘅「錶板投射顯示屏」嘅操作模式就是相同概念原理。只不過理論上的確要得到車輛製造商嘅同意及在廠方手冊訂明嘅要求將咪錶同 OBD 接駁。

GPS 表面上看似簡單，但實際上需要响軟件方面做相當嘅功夫，最主要係因為衛星飄移或建築物引致訊號傳輸偏差，同埋例如多層路面引起計算錯誤。最顯淺嘅例子就如下圖

衛星總會以為架車上咗西九龍走廊但實際係响大角咀道，然後當車輛右轉入南昌街，如果程式無做位置修正就會導致運算錯誤。仲有隧道內無法接收GPS，系統又如何配合例如電話網絡或其他無綫通訊網絡維持運算。

不過，不論以上兩種技術如何可以令到的士咪錶運作得更準確、更有效杜絕干擾作弊，就是接近40年無更新追上汽車科技發展嘅 Cap. 374A 法例，對於運輸署驗車組別而言，佢哋最叻只係識得第5 (1) 條有權用盡為所欲為鍾意就話架車邊忽唔安全唔鍾意就直接出「肥佬紙」嘅啫。而的士行業，尤其是車主，除咗申請加價然後加車租推高牌價之外其餘都係四個大字「關人L事」，所以呢篇文寫嚟其實有少少嘥氣。只不過我哋唔寫又有少少頂住度氣，咁咪寫出嚟浪費吓大家時間咁囉。