話說較早前喺巴士台嗰邊曾經出過一篇文，提醒各位巴士車長要留心喺巴士廠入面出沒嘅流浪動物其實係唔識自己睇車嘅，所以希望各位巴士車長揸巴士嘅時候要小心留意流浪動物出沒。
當時都有提醒各位近來天氣轉涼之後，要小心流浪動物可能會留喺車輛入面避寒而喺開車時間造成慘劇。
話口未完，香港就已經出現咗入冬之後第一個寒冷天氣警告，睇見大家出街都著多咗厚衫，咁汽車台呢邊當然都要再次提醒各位司機，要留意喺街上流浪嘅動物其實係有機會借用大家嘅車輛作為一個避寒之處。
所以借用護理的一點一滴嘅圖提提大家，喺每次開車之前，不妨試吓拍打車身、製造一啲聲響，叫醒有可能留咗喺車輛入面一啲隱蔽地方嘅流浪動物，畀啲時間佢哋離開你架車，免得一個唔覺意上車即刻扭匙再畀油就造成慘劇――始終都係一條生命。
諗住無乜所謂呀？不如睇吓被汽車引擎打傷嘅流浪貓傷勢有幾嚴重，會唔會令你改變觀念呢？
Be the first to comment