第二代Tesla Roadster接受預訂

$39,000 就可以做 Tesla Roadster 車主？梗係唔係啦，$39,000 只係訂金嘅首期咋！

Tesla 第二代 Roadster 噚日正式喺香港接受預訂，以 $39,000 呢個金額作為招徠。但呢 $39,000 只係訂金嘅首期，並需要先以信用卡支付，再喺十日內以電匯支付餘下訂金 $351,000，等電匯成功確認之後，先叫做成功預訂到一部 Tesla Roadster！至於全數車價到底係幾多錢，廠方喺 2017 年發佈嘅時間，提及過車價係二十萬美金，即係差唔多 $1,600,000 港紙。作為一部以超級跑車定位嘅電動跑車，你又會點睇呢？

講返 Tesla Roadster，第一代採用 Lotus（蓮花）嘅浴缸式底盤設計，尺寸上算係電動小跑車。嚟到第二代，全車重新設計，採用可掀車頂式開蓬四座位佈局，令車身體形有所加大。配用全新嘅 200kWh 電池模組，令續航能力大幅提升到 1000km。前一後二擺放嘅三個摩打綜合提供驚人嘅 10,000Nm 扭力（我無打錯！），0-100km/h 加速只需要 2.1 秒，極速更加有 400km/h。

講咁耐，訂完幾時交車先？Tesla 表示，因為產能、疫情同晶片短缺等因素，第二代 Roadster 同 Cybertruck 一樣，暫訂會喺 2023 年開始生產同交付。