一年一度嘅「香港車仔展」又再舉行。今年嘅會場移師至灣仔合和中心二期嘅「合和大禮堂」，除咗面積大幅增加至逾 20,000平方呎，令到展商數目同攤位面積均有所增加之外，樓底高達8m，空氣流通更佳，展商及參觀者均認為場地較往年的舒適。而且會場能予汽車駛入，令到「車仔展」嘅內容更加豐富。
今次車仔展嘅參展商逾 50 個，除香港本地廠商、牌子代理之外，更有來自馬來西亞、印尼及台灣的展商。以至可謂全球知名玩具車廠商 Tomica，首度參展之餘，仲有推出多款會場限定車仔，包括《頭文字D》30週年紀念套裝、Premium Racing SKYLINE GT-R 1999 JGTC R34 GT500 Test Car及罕有Event Car，更帶嚟一部真正嘅 豐田 TRUENO AE86 响會場內展出。
另一個較為參觀人士留意嘅展商為「本地薑」Model 1 / Network Shuttle。响今次車仔展推出三菱 FUSO F系 The Great 拖頭模型，與及首度發行的1:120 Marcopolo Audace 1050 車身旅遊巴士。
除咗汽車模型、玩具，今次展更有鐵路、情景模型。包括國鐵小站推出廣州至深圳K000X -22型「綠皮」鐵路車廂，與及由 MINICITY 製造嘅N-scale 磁導行走巴士模型。另外，來自馬來西亞嘅 Kraken House Diorama 推出仿照深水埗南昌大押嘅情景組合，與及五款以參照旅遊城市怡保嘅舊式屋宇嘅情景組合產品。
今次主辦單位更夥同 Marketoo 市集 Crossover，設立「潮創市集區」，推動本地原創及潮流精品設計。其中，無紙用工作室特別展出12款親自創作及繪畫的汽車主題海報。另外仲有HKMT 以香港公共屋邨為主題嘅匙扣，與及 NO2CRAFTY 刺繡，都充份反映本港嘅文創行業的活力及專業。本台稍後將有較詳細的介紹。
仲有「微縮世界展示區」展出30個場景模型，除咗令人發笑嘅「大帽山英雄亭路障」，油麻地警署、堅記車房呢啲香港元素嘅作品之外，仲有日本、泰國、台灣嘅地道場景，細緻程度簡直嘆為觀止。
錯過咗今年嘅「車仔展」的話，不妨欣賞吓本台嘅相片。又或者等待相信下一年會再度舉行嘅消息吧。
Be the first to comment