封殺古董車為環保？欲加之罪何患無詞！

先此聲明，此文擺明長篇大論，嫌悶嘅就「buy因渣」嗰句 Quit 囉！

一個月前 (31MAY2022)傍晚，政府突然發出通告取消「古董車」入口香港出牌嘅廢氣及噪音豁免，仲要係大約六小時後生效，冚世界即刻「鬼殺咁嘈」，尤其是買賣/代辦古董車入口嘅車行，亦都有訂咗車但架車未運抵香港嘅買家。另一邊廂，一班「仇車撚」、「環保撚」(恕要粗口字直出，咁先至表達得清楚) 就拍爛手掌開晒香檳，既話「環保德政」，又話「炒賣惡果自招」云云。各車媒同業紛紛趕急出稿、聯絡車商攞料訪問，我哋人手、資源有限，加上「懶係要深入啲」所以都遲咗啲啲先至出文。但事隔接近一個月，政府又突然前日(29JUN2022) 傍晚出通告，修訂「古董車」入口出牌條件 ── 首先，將「年期」由20年增加到30年；要求必須驗廢氣同噪音，只係無再話要達到 EURO 6 而只係存檔記錄 for 日後驗車結果唔能夠 worse than the report；同埋予6月1日前訂咗嘅15年以上嘅車有半個月「寬限期」。

同大約一個月前一樣，冚世界繼續「鬼殺咁嘈」，車商、準買家怒轟「點解30年唔係20年」「點解以前唔駛驗依家要驗」；至於班「仇車撚」、「環保撚」當然怒轟政府「向車商屈服、利益輸送可恥」之類。另外，review 返過去一個月嘅所有報導、評論「撈埋一碟」分析，唔計李耀培嘅表態而「俾人追殺九條街」，幾乎全部都係搔不著癢處，其中最關鍵嘅係點解政府會咁改、可以咁樣改。

「古董車」入口出牌從來只係口講口賠

其實關於「古董車」入口香港出牌，幾十年嚟都只係環保署署長運用酌情權以行政通告方式作出豁免廢氣噪音排放限制。即係點？根據《空氣污染(車輛設計標準)(排放)規例》(Cap. 311J) 及《噪音管制(汽車)規例》(Cap. 400I) 訂明所有車輛 (記住係「所有」)，必須符合有關嘅管制標準先至可以出牌。簡單講即係依家必須要逹到 Euro 6 (或美國EPA LEV III 或日本平成28年) 嘅車先至可以出牌。而「古董車」(就以以往嘅「訂義」20年為基礎) 係無可能達得到呢啲要求；even 時光倒流廿年前嘅 Euro 3，你搵架1982年出廠嘅 豐田 Corolla TE70 又好、平治 W126 300SEL 又好、日產 280ZX又好、路華 3500 (SD1) 又好…… 係絕對無可能達到要求。

於是乎環保署署長就運用法例賦予嘅酌情權豁免「出廠年份逾20年」嘅車要達到呢條法例嘅要求。業界、坊間一直嘅講法「過咗廿年嘅『老爺車』」就係基於呢個情況下走出嚟。當前20年變30年，或是「寬限期」呢半個月變咗15年，好聽啲講就「口講口賠」，難聽而直接啲講「之前俾就人情，依家唔俾就道理」！

既然「過咗廿年嘅老爺車可以出牌」只係基於酌情權，「政治化」講法即係從來都係「人治」嘅措施。有人為因素就有「搬龍門」嘅可能性，就必然存在。

唔明？睇返 HK Bus Channel EP13 平治 Sprinter 516CDi 低地台小巴 應該會清楚好多。硬要「打爛沙盤問到篤」？直接講吧 ──《道路交通(車輛構造及保養)規例》(Cap. 374A) 已經接近四十年無董建華嗰句「與時並進」修訂，舉一個最簡單易明嘅例子：根據第89至116條，所有車燈，不論頭燈尾燈細燈大燈指揮燈迫力燈後波燈車牌燈，都必須係用鎢絲燈膽發光….. 依家大部份嘅車嘅燈都已經轉用HID或LED。

HID 或 LED 係無鎢絲或其他金屬絲通電發光 -> 唔合法！點算？換返佢囉！換唔到呀？咁咪申請 exemption 囉 -> Cap. 374A 第四條：

如署長認為如此作是為了公眾利益，可豁免任何車輛或任何種類的車輛符合本規例或其任何部分的規定。

乜嘢叫「公眾利益」就唔去考究喇，但就又係搞到驗車趴唔趴匙係「人為因素」決定囉！再加埋第5(1)條：

每部車輛，包括所有車身及配件在內，須符合以下的規定
(a)採用合適的材料，妥善及適當地構造；
(b)在良好及可使用的狀態；及
(c)其設計及構造方法，使其能抵受相當可能會在運作時遇到的負荷及應力。

該集節目中呢兩個畫面就係咁樣嚟嘅。套用返响 HID /LED 車燈，亦真係發生過 _(疑似)「鬆章」俾「霸權牌子」。詳情唔係本文重點，所以留待他日有機會先至再講。

Apply 返响「古董車」嘅事上面，相信大家應該明白晒到底發生緊乜嘢事！只不過不論買嘅、賣嘅，唔計「我討厭政治」，在商言商從來都短視，於是乎車商業界無人真係因應「酌情權」呢個風險去做啲需要做嘅事。

「古董車」昔日唔駛驗廢氣噪音，但仍然要俾運輸署驗「安全」。Side track 講多少少，幾年前運輸署無端端以「安全」為理由取消古董車嘅安全帶豁免，令到好多1980年代或以前出產嘅車即使能入口及出牌，因為後排座位只得兩點式安全帶甚至無安全帶而法律上唔可以坐人。既然幾年前有單咁嘅事但業界都仲唔「醒爬」….

香港人的愚昧白痴「成就大事」

正所謂「香港只係一個井」── 淨係巴士台剛最新一集 EP17 MAN TGL 8.190 Marcopolo BRAVIS 車身 中型旅遊巴士，十個香港人起碼八個唔知道歐洲開始盛行呢類巴士，更當然無乜邊個明白一啲技術層面嘅事而然後好易被帶風向「呢啲車到底載貨定載人㗎??」

而對於「古董車」「老爺車」，十個香港人起碼七個半只會聯想到超級跑車、高級豪華房車。然後只會聯想到乜都錢錢錢，認為「玩」古董車嘅必定腰纏萬貫，甚至將「炒的士牌」投射於古董車認定不過是投機工具，因而對政府嘅行動話車商業界自食惡果云云；與此同時，無幾多人懂得從文化、歷史角度去看待古董車，再然後認為「乜叉文化」不過是車商們掩飾炒賣嘅藉口而已。

咁就先問呢班「粉腸」EP02- 1987年 豐田皇冠 Toyota Crown Royal Saloon (GS121) 呢一集提到呢部車記載住車主 Terence 嘅父子情，How to measure by money???

講啦？唔係一講「古董車」就乜叉都錢錢錢錢錢錢錢錢錢錢 嘅咩??? 做乜答唔到點計呢舊錢呀喂!!

不過咁，古語有云「一隻手掌拍唔響」，香港老爺車會 (Classic Car Club of Hong Kong) 會務簡介寫到明「老爺車收藏已不只是一種嗜好，而是一項增值能力得高的投資。」

正如有FANS當眾掉晒佢啲唱片嘅譚詠麟有句金句「寧俾人估，莫俾人知；寧俾人知，莫俾人見」…. 老爺車會形同送子彈核彈俾嗰班「仇車撚」同「環保撚」！又再恕要粗口字直出 ─「老爺車會呢啲咪叫做憨鳩囉」！

錢、文化 vs「左膠」

無錯，承如早前嘅文章提到「『老爺車』點都涉及到錢」。擱開炒賣嘅問題，車主都係用自己嘅錢買車及「養」，但當駛到街上可能被途人「打雀咁眼」，或在老爺車展起勢影相「打卡」；又例如近年澳洲國慶日都會有兩部九巴一部中巴响雪梨載人遊車河，或早幾個月一部城巴出沒於倫敦拍攝劇集《The Crown》，普遍港人嘅反應不贅了。

不過，乜水都沒向車主俾過一分一毫亦係不爭嘅事實，包括那些「仇車L」同「環保L」。奈何呢啲或許可以通稱「左膠」之徒，對古董車嘅文化價值論點就叫囂「不過是掩飾炒賣的藉口」，但當一啲「保育」課題涉及私人產權建築物就試圖「楝人啲產」搶光環。加諸前文另提及「舊樓重建所衍生嘅環保問題」，清晰可見呢班「仇車L」同「環保L」徹頭徹尾只圖個人利益好處嘅偽君子。

至於「環保」嘅問題，雖然的確有「重改」情況，但官府那堂而皇之「有人濫用」嘅藉口，卻又拎唔出數據資料具體說明點樣「濫用」同有幾嚴重，但咁就成功驅使所謂環保份子煽動普遍根本對汽車欠缺充份認識嘅公眾 (與及「磚家」李耀培) 支持新措施。再者，若果啲車主真係改到噪音及廢氣超標，現時已有制度可以處理，更證「環保」某程度上只係偽命題。如今以我哋所知只係一小撮「濫用」而要整個古董車「攬炒」，得反問「環保份子」那些受鋰礦開採污染影響嘅人民就是給你們「攬炒」嗎?!

硬要「左膠」爭辯利益輸送的話，那家將會承辦「古董車檢驗」嘅公司不是得益者嗎？那家相信預計可能成為「古董車檢驗」嘅公司，近年期中一項業務就是承辦「路邊廢氣監測站」。

當電動車越趨普及，能「捕獲」的「墨魚」數量減少，可以預視終有一日審計署會批評環保署浪費公帑，然後呢間公司嘅生意……..

姑且再爆多少少「陳年舊史」── 好多年前，環保署對於巴士小巴 type approval 申請程序一概不承認來自歐盟、日本發出而內容 totally matched Cap. 400I 要求嘅測試報告，而指定要响香港交俾某間公司做測試，直到測試嘅路段兩側興建咗建築物而不再符合 Test progress criterias 才承認來自歐盟、日本檢驗機構例如 VCA、TÜV 發出的報告。即係點？唔好要我再講咁白啦………….

古董車確實蘊藏住歷史文化元素，唔係班「左膠」以「金錢是萬惡的」就可以全盤否定。雖然，近廿幾三十年嘅香港變得「乜都睇錢」而使表面上出現變質，但古董車於歷史、文化嘅本質係無變。只不過對比例如英國、澳洲、加拿大，香港欠嘅就係一套「排除人治因素」嘅古董車牌照制度，但當前嘅香港，大家今晚早啲瞓吧。至於估計千幾部因此而相當可能不能出牌嘅古董車點樣算，大家上網睇相就算囉，但記得唔好偷相。唔該。