根據網絡流傳嘅消息，2022年4月10號朝早10點左右，中国廣東佛山南海保利碧桂園和府嘅停車場發生咗一宗車禍。
本身喺停車場入面有人失手撞車就「唔係少見」，但今次係撞完之後嘅情景先至引起網民討論：
叻喎！撞到好似9¾月台咁嘅？
「慘啦！係咪撞到成個車頭扁晒呀？」
大家換個角度睇吓，原來佢唔係撞扁晒個車頭，而係撞穿咗幅牆，又撞到個窿啱啱好係架車個形咁。走到去牆嘅另一邊就清楚見到車頭同幅牆嘅「慘況」。
好彩被撞嘅唔係主力牆而只係分隔牆，牆身只係「砌磚」，車禍之後牆身大量水泥磚被撞到彈出幾個車位咁遠，地面滿佈磚碎，又或者可以話好彩牆嘅另一邊當時無車無人，避免咗更嚴重嘅後果。
至於架車就車頭蓋縮起咗，車頭已經認唔返個樣，不過據聞就車頭兩邊轆都仲算完整，A柱都未撞爛。車廂入面嘅安全氣袋全部及時彈出，整體都保護到當時車廂入面嘅人無受傷。
根據網絡流傳嘅消息，涉及今次停車場車禍嘅係1架「蔚來ES8」，屬於中国蔚來汽車推出嘅鋰電池電動中型運動型多用途車（SUV），2018年6月底喺中国市場面世，而中国政府對「蔚來ES8」有電動汽車補貼金67,500元人民幣。
中国蔚來汽車經客戶服務部表示「對於今次車禍暫時仲未有調查結果，唔排除係司機失誤操作，目前只能夠等調查結果出咗之後先至可以確定起因」。
近年唔少「新能源車」都標榜「高智能」，但今次車禍就好明顯宣傳片入面講嘅咩「雷達偵測、主動煞車」就無反應喇！難怪中国唔少網民都批評：
「人哋外國啲智能車就真係識得有人衝出嚟會自動煞車，中国自己啲智能車對著成幅牆都一樣直撞埋去」
「車講到有幾『智能』都係假，司機『智障』係科技都幫佢唔到」
不過講起蔚來，佢其實係有一套NOP（Navigate on Pilot），屬於導航系統加上Pilot自動輔助駕駛，聲稱允許車輛喺特定條件下按照高精地圖導航規劃嘅路逕自動巡航行駛——
但係！！！！
2021年8月12號，上善若水投資管理公司創始人、意統天下餐飲管理公司創始人、美一好品牌管理公司創始人林文欽，就正正揸住1架「蔚來ES8」，啟動NOP領航狀態後喺瀋海高速涵江段發生車禍而死。
所以話，唔好咁盲目單純依賴未成熟嘅高科技呀！
Be the first to comment