自從2016年香港小輪集團經旗下洋紫荊維港遊推出懷舊汽車渡輪遊之後，每次再辦都吸引唔少「老香港」同「扮係老香港」嘅車友參加。
2020年5月，洋紫荊維港遊再次推出「懷舊汽車渡輪下午茶自助餐」，原本諗住喺5月31號、6月14號同埋6月21號嘅下晝2點，由北角汽車渡輪碼頭各開出一班。
但係由於反應非常熱烈，佢哋好快就需要「加班」，喺6月28號、7月5號同埋7月12號嘅下晝2點15分，由觀塘汽車渡輪碼頭各加開一班。
之後佢哋再安排喺6月25號下晝2點同埋7月1號上晝11點15分，由北角渡輪碼頭各加開一班。
咁究竟今次呢一個「懷舊汽車渡輪下午茶自助餐」係點嘅呢？道聽途說不如親身參加，一於喺5月31號去北角汽車渡輪碼頭上船睇吓點先。 （●+++●）
去到北角汽車渡輪碼頭，閘口有清楚嘅指示牌引領大家入去。不過大家要小心喎，因為每一日都有一啲危險品車輛會利用汽車渡輪橫越維港，小朋友見到「大車車」可能會好興奮，記得拉實佢哋，唔好畀佢哋周圍走呀！
今次呢個懷舊汽車渡輪之旅，洋紫荊維港遊都係派返原本佢哋安排畀旅行團所用嘅「民儉號」。
大家睇見碼頭跳板放落去船上面嘅嗰一刻都非常雀躍，不過唔好忘記要聽從現場工作人員嘅指示：首先畀無揸車、徒步嚟參加嘅乘客上船先，揸車上船嘅朋友就要留意職員安排擺車嘅位置。
畀一般市民私家車輛使用嘅汽車渡輪服務喺香港已經絕跡多時，大家當然就首先要同一大堆喺渡輪上面嘅車嚟返張大合照先啦！
大家啲車就擺喺最下面嗰一層，人就可以上「2、3樓」坐低唞吓。
當然收得每人190蚊梗係唔會畀你上船齋坐兩個鐘頭咁戇居啦！大家可以放心，係有嘢食嘅，自助餐模式，鍾意食就排隊去攞多兩次都得！（● v ●）
由餐牌上面可以見到，今次安排嘅自助餐，食物都非常之有香港風味，當然你唔好大貪到以為收費190蚊嘅自助餐可以拍得住半島、四季嗰啲啦！
呢度可以同大家講吓：嗰個焗豬扒飯係好食嘅，肉醬意粉個肉醬都唔錯。（190蚊嘅任飲任食唔好要求咁多喇！感受下自己架車搭船嘅樂趣先至係重點呀嘛！）
當頂層嗰間餐廳有冷氣嘅時候，身處天時暑熱嘅香港，應該就無乜人會想全程停留喺2樓呢個開放式座位區喇！所以就連小賣部都無開門囉！
難得搭到汽車渡輪，當然大家除咗幫自己架車「打卡」，都要幫自己「打卡」嘅！話晒停車渡輪嘅客艙同平時其他渡輪都好大分別㗎嘛！
2個鐘頭嘅行程話長唔長，好快就會返去原本嘅起點放大家上岸，大家睇著汽車渡輪埋岸都係一個比較同平時唔同嘅感受。（起碼港外線渡輪普遍都唔係「兩頭車」， 天星小輪又好難得可以企正船頭睇減速嗰陣時車葉捲起嘅浪花，現場所見有啲小朋友睇見都覺得既興奮但又有啲驚囉！）
大家落船嘅時候又要記得留意職員指示喎！不過今次就會倒返轉，係有車嘅人先揸車落船，其餘徒步嘅乘客就記得等車落咗船之後，安全情況下先至行碼頭跳板上岸。
講起上嚟，咁樣嘅汽車渡輪遊，當然係一班朋友揸車上船就最有感受啦 ！
可以順帶一提， 如果大家係對影渡輪非常之有興趣嘅話，今次洋紫荊維港遊安排嘅活動，可以滿足大家多少少嘢：大家有機會可以影到汽車渡輪載著私家車經過中環灣仔一帶海面，呢個情形係今時今日都算少有啦！
如果大家仲想報名參加嚟緊嘅洋紫荊維港遊「懷舊汽車渡輪下午茶自助餐」活動， 記得趁早搵洋紫荊維港遊嗰邊報名呀！
1 Trackback / Pingback