上兩個月，國際油價持續下跌，兩個禮拜之前更跌破 $0，最低見 -US$37.63。唔少香港車主又再大叫「油魔加快減慢，合謀定價可恥」，但嗌完之後，仍然要乖乖進貢。點解香港嘅汽車用燃油價格貴絕全球，好多人只係識得鬧油公司謀取暴利，真正的實情 (唔係重覆修辭，對住香港人係要咁寫嘢) 係點，真係一如文題。唔好又話我哋「政治化」，就係香港人習慣性政治潔癖、逃避政治、我唔識政治、我討厭政治，結果咪就是入油都被政治搞到咁囉。
首先睇睇下面嘅 Cap 圖
葵涌市地段編號 527 vs 470，睇落有唔同，但「地點」都係寫貨櫃碼頭路，而貨櫃碼頭路幾十年來都係得一個油站，位置响葵豐街對面、現時「葵芳(南) 巴士總站」旁邊。
1996年，加德士以 $1.65億投得經營權；2018年，中石化出價 $5.4億。二十一年嘅租金升幅接近四倍，唔好話你架車應該一早劏咗 (甚至劏咗兩架了) 而唔可能升值四倍，你嘅人工响呢廿年以嚟有無升四倍吖?!
應該好多香港人唔知油站要「交租」俾政府，更應該無乜人知道香港特區政府於2000年取消油站「約滿自動續租」制度，改為約滿後重新招標。
寫到明「招標」，當然係價高者得啦。油站租金貴咗，油價點可以唔貴啲呢！呢個世界永遠都係「羊毛出自羊身上」㗎啦，你估「咸魚」嗰句「巴士公司加司機人工係你嘅事，唔好要我俾多個崩」真係會响現實出現呀！
過去廿幾年以來，唔少油站「招牌」都換上中石化，例如銅鑼灣堅拿道橋底、鰂魚涌英皇道 (北角官小側)、青山公路大窩口段、旺角太子道西 (花墟對面) 等等。而過去呢廿幾年，香港人其中一句講得最多嘅說話就係「祖国很強大，大把銀紙派」── 銀彈大把，「價高者得」都可以盡佔優勢。
中石化一邊廂「高價投站」，另一邊廂提供最高的「折扣回贈」(不論散客或車隊)，擺明「派錢吸客」並順勢削弱其他油公司的營業收益。在商言商，預期業績下跌且難見正面前景，當然選擇「退場」── ESSO 於香港嘅油站數目買少見少，並流傳有意撤出香港，其中一個原因就係咁。
扣除香港的車用燃油稅每升 HK$6.06，即淨價約 HK$10.0，比台灣現價約 TWD20.0 仍貴一倍。甚至再「算盡啲」減埋「油卡折扣」淨價約 $7.5-$8.0，仍然比台灣貴最少50%。無錯，就算無「偉大的共产党」的銀彈都無可能平過台灣，但政府更改油站承租制度而「強大的祖国」得到近乎絕對嘅優勢而油價仍然高企就係不爭的事實。
唔少車主縱抱怨「中石化啲油好嗱喳、無咁襟燒」，但依然因為「中石化平啲喎」繼續光顧， 十足 CCTVB、「豐田無得頂」的慣性收視。中石化呢隻「怪獸」不知不覺地養大了。
所以，大家望住電油價格仍然每升 $16 以上，而台灣相信短期內也會是 $16 一升，台幣呀，嘅時候，真係唔好怨。享受咗「祖国的恩情」咁耐，你估唔駛還呀！
Be the first to comment