因為新型冠狀病毒（武漢肺炎）喺全球持續擴散，引致越嚟越多人受感染，世界各地都頒佈咗旅遊禁令，航空業自然首當其衝，之前都有講過有原本揸飛機嘅機師唯有轉行走去幫超級市場做司機揸送貨貨車。
人，話轉新工，只要自己有能力，都可以能屈能伸一下…但作為航空業硬件嘅機場，又可以點樣喺今次航空業冰河時期轉型呢？
作為歐洲波羅的海三國之一嘅立陶宛，首都維爾紐斯國際機場近年快速發展，喺2019年全年旅客量超過500萬人次。
只不過當去到2020年，面對全球嘅新型冠狀病毒（武漢肺炎）令到世界各地都限制旅客出入境，旅遊業大受打擊，航班數量大幅削減，立陶宛交通部轄下嘅維爾紐斯國際機場公司當然就諗下點樣可以喺今次逆境之中做返啲嘢。
佢哋決定將機場禁區入面，停機坪一部分現時屬於多餘出嚟嘅空地，畫咗做汽車戲院――咁樣就可以畀當地居民能夠出吓街睇戲，叫做有啲戶外活動，但係又能夠保持返相應嘅「社交距離」。
使唔使擔心飛機升降嘅時候會有噪音影響到睇戲嘅心情？其實依家航班數量都好少，而且電影嘅音效都係經無線電廣播，由車上面嘅收音機接收咗再播放出嚟――可能計落仲少滋擾過平時喺戲院入面睇戲？
至於會唔會有人將平時喺戲院入面摸黑偷雞做嘅事換成喺車上面做？你專心啲留意個螢幕睇返套電影啦！
Be the first to comment