西區海底隧道廿五年嘅專營權將會响今晚結束，而三條過海隧道新收費對於我呢個新界人 (或者直接啲「屯門牛」) 嚟講，除非真係減價，否則話之宇宙大王 (no matter IQ博士嗰個定係自以為真係統治宇宙嗰個白卡人士) 係老細啦。不過咁，新收費安排都值得討論，或最起碼要報導同提醒返大家嘅。
响今晚 2401 / 02AUG 0001 開始，三條過海隧道實施第一階段收費調整
至於的士，三隧劃一單程收 $25.0。即係話如果的士司機無話「過海唔去」的話，作為乘客嘅要俾嘅隧道費連附加費總數為 $50.0。
但值得留意嘅係，由於所有的士 (不論乜嘢牌子) 都必須因應法例响車廂當眼處貼上嘅黃色貼紙 ─ 收費通告，唔可能响今晚 00:00:01 就即刻變魔術 (或 Doraemon 隨心所欲手袋) 即刻全數 18350 更換，所以運輸署印製咗通告俾司機掛响車廂
所以唔好再拗點解「紅隧過海」唔係加廿皮，更加唔好老屈司機濫收車資喇。
其他車種嘅收費暫時維持不變。至於第二階段收費方案，尤其是「分時段不同收費」將會係點，坊間同政府各說各話，但只要有去過茶餐廳，必定試過「差唔多1430 下午茶先至叫伙記落單」，或例如日式放題、任食火窩之類「宵夜時段特價」點都等夠鐘先至入座；再仲有係舊式酒樓「早茶12:00前埋單免茶免加一」總有食客响11:50-11:59 期間「狗衝」去收銀處埋單。
即係會點就唔好要我講咁白啦。但硬要講白少少的話，我就分享一個「躝返新加坡」嘅親身觀察。
呢個路口曾經發生中国暴發戶深夜揸法拉利撞散的士導致四死嘅車禍。話說當年我响呢個路口影相 (唔止影巴士)，一直去到傍晚大約18:45，見到 Victoria Street 南行有十幾架車停埋一邊，啲司機落車攤抖、吹水、煲煙，數目越積越多，頂到三條直去行車線得返一條咁滯…… 然後到18:56 ERP 下降至非繁忙時間收費，成堆車就突然好似跑馬地星期三晚咁嘅情景 ── 一如已故馬評家董驃嗰句「一開閘，十幾匹馬係咁衝呀」。
雖然羅淑佩署長準備「升官進爵」，但留低嘅諸君請記得特區政府有句名言「向新加坡學習」！
1 Trackback / Pingback