文字：Ian CHAN
攝影：TK
後製：編輯部
香港車壇年度最大盛事「香港國際汽車博覽」（IMXPO HK）已經舉辦到第5屆，由2025年12月11號到14號假香港機場亞洲博覽館舉行，呢次展覽首次由日本車壇最大盛事之一「東京改裝車展」全力協助舉行，由於雙展聯動，展覽涵蓋展品較以往豐富，汽車台呢一篇就先簡單為大家介紹一下IMXPO嘅乘用車展銷部份。
一如往屆，中国廠商旗下嘅電動車牌子係主力參展商，參觀者一入到展場就會見到由APMG代理嘅「GAC 廣汽集團」打頭陣，展出除咗依家大賣嘅 AION（埃安） V 以及 ES 型之外，同時展出其他新舊車款。
其中新車方面有首次展出以及發佈嘅AION UT ，同時廣汽集團委任人氣女神葉蒨文（Sophie）做呢款車嘅「産品經理」。
至於由富利堡代理嘅「MG」就發佈了咗MGS6 EV呢款新車，呢邊就搵咗陳山聰擔任「品牌銷售總監」——新車原價港幣$269 000（一換一後），展場早鳥優惠港幣$258 000（一換一後），發佈當日仲加推「陳總監」會場限時優惠，減到港幣$248 000（一換一後）優惠有限，售完即止。
擺喺富利堡對面就有中國最大車企之一嘅吉利（Geely）汽車，展出咗新車Geely E5 Max Plus車型，屬於E5系列嘅長續航版本，連同早前已經抵港嘅E5以及E5 Pro，E5家族已經悉數喺香港開賣，售價由港幣$199 000 （一換一後）到港幣$239 000（一換一後）。
吉利旁邊嘅係奇瑞OMODA&JAECOO，展出早前已經喺「香港國際汽車及供應鏈博覽會」展出嘅車款。
再入就係錦龍代理嘅展位，同時展出佢哋代理嘅 Zeekr（極氪）、KIA（起亞） 同埋Audi（奧迪） 嘅電動車款，展出嘅車款計有已經熱賣嘅 Zeekr 009 同埋 7X 之外，仲特別展出即將發售嘅高性能電動旅行車 Zeekr 007GT 同埋超豪華6人電動SUV 車款Zeekr 9X。
中後排嘅 KIA 咗除本身已經賣緊嘅 EV系車款，最矚目嘅必定係榮獲《2026 International Van of the Year》殊榮嘅 KIA PV5，呢架係全電驅動嘅廂型車款，可以亦選配 2/5人客貨車版本，或者5人乘用車版本，現場所展示嘅係1架「2+3」座位布局、5人座位配置嘅乘用車版本，上述新車已經接受預訂。
再行入啲就會見到左右兩邊分別係「BYD比亞迪」集團 以及「Leapmotor零跑」嘅展位，Leapmotor為大家帶嚟2026年將會進入香港市場嘅 B10 demo car，B10身旁嘅係中国國內發佈咗無幾耐嘅 Lafa5（B05）型號。
由Leapmotor向主舞台方向走過去就係「IM Motors 智己」嘅 IM5 同埋 IM6，外觀上開始擺脫「中国美學」嘅設計，有外國參觀者都仲以為「智己」真係南韓嘅牌子。
再入少少就係中國嘅另一間汽車廠商「吉祥汽車」嘅展區，「吉祥汽車」其實係「均瑤集團」嘅一間子公司，同集團之下有「吉祥航空」，所以廠商將航空業嘅意念擺落去汽車嘅外觀設計，講到話可以玩「甩尾」之餘，仲整咗一款橙色車廂內裝設計（當然唔計車尾箱🤣），代理話「連安全帶都係橙色，人哋嗰個德國牌子要加錢先至有㗎！」
上汽通用五菱喺會場發佈新車 Wuling Darion EV MPV 車款，同時宣布「EV車控」王祖藍先生伉儷成為呢款車嘅首位香港車主，仲即場進行贈予交車儀式。Darion EV暫時係香港車場中小型電動MPV中價錢最為相宜且空間最為寬敞嘅車型之一：新車售價係港幣$258 800（一換一後）。同場展示嘅仲有新款「繽果」，售價港幣$108 800（一換一後），代理為咗宣傳主打「可愛」嘅外形，仲整咗一架「披毛貓貓車」！
人汽集團喺香港一向就出名在保有一系列豪華超跑，呢次除咗展出佢哋旗下保有嘅多架超跑外，仲首次喺香港展出 KTM X-BOW GT-RX。
講到電動私家車又點少得日本牌子，大昌行代理嘅「日產Nissan」展出 Serena ePower 同埋 ARIYA 純電SUV車款。
至於宏益汽車代理嘅 Mazda 就展出即將喺推出右軚版嘅左軚樣版「長安馬自達」 Mazda 6e 純電動私家車，側邊仲有吉利旗下「RIDDARA」RD6 全電動農夫車（Pick-Up truck）。
東京改裝車展 · 香港 (TAS · HK) 2025
2025年12月11~14號
1100~2000
亞洲國際博覽館 8 及 10 號展館
香港國際汽車博覽 (IMXpo) 2025
2025年12月11~14號
1100~2000
亞洲國際博覽館 3 及 6 號展館
Be the first to comment