【駕駛態度】泊得白痴兼自私 好彩架車無遇鶳

近年有個講法…是咁的…香港政府有計劃咁一邊容許車輛數量增長,卻同時一邊削減公共泊車位,妄圖以增發違例泊車定額罰款告票帶動政府收入(好似係…除非唔係) (=_=)」

即係咁講…香港普遍公眾都唔係「塔利班」,一般都唔會敵視揸車出街嘅人…大多數時間大家都深知一位難求,見到所謂「違例泊車」都唔會「跳晒掣」。

但正所謂「鬭木佬造門」,要過得自己過得人:公眾隻眼開隻眼閉咁樣容忍各位司機大佬喺唔合法嘅位置停泊車輛,當然起碼就唔好搞著其他人啦!

只不過凡事總有例外,出到街總有人做傻的嗎仔或者有心濫用呢一種灰色地帶…喺無抗爭訴求下將自己嘅車輛停泊喺一啲阻礙到其他人行走嘅地方,咁就唔係一件好事啦! (⊙_⊙)..l..

就好似頭先黃昏時分,大家覺得忙咗一個星期,諗住星期五快啲返到屋企可以同屋企人共聚天倫,但又咁啱喺尖沙咀西塞車塞到阿媽都唔認得,要等架村巴返屯門又等咗好耐唔見影…正在一肚火嘅時候就會心諗:究竟邊個「好人」做「好事」呢?

原來喺尖沙咀亞士厘道有一架豐田七人車擺咗喺路口雙黃線,令到原本想由北京道轉入亞士厘道嘅邨巴唔夠位轉彎,緊貼邨巴後面嘅車就全部塞死返出去九龍公園徑、梳士巴利道,仲有… (^_^)y (係咪諗起都好高㷫呢?)

七人車嘅司機仲要「聰明」到既無寫「六大訴求 缺一不可」,又無留低電話號碼畀大家撥個輪通知佢「你阻住全世界呀!」(相信頭先尖西好多人關心令壽堂嘅「運動」量) (+_+)』

好彩今次大家各位司機同路人守望相助,讓啲位畀邨巴可以倒後駛走,如果唔係喇喎…分分鐘尖西成班人一齊「召喚神獸」,隨時架七人車醫返都嘥藥費。

總括啲講句啦:偷雞咁樣亂咁泊車都要睇環境做人㗎!

3 Trackbacks / Pingbacks

  1. 【駕駛態度】泊車擺彎位窄路 旨在引眾人發怒? - 汽車台 HK Car Channel
  2. 【駕駛態度】停車走人留電話 咁畀號碼點樣打? - 汽車台 HK Car Channel
  3. 【駕駛態度】車泊站頭阻巴士 好彩你肯移一移 - 汽車台 HK Car Channel

Leave a Reply

Your email address will not be published.


*