恆馳終於有部識郁嘅車睇吓﹗

仲記得 #恆馳汽車 嗎？貼返個舊 Post Remind 下大家先︰

「恒驰汽车」到底係何方神聖？

今年 #恆大汽車 動作頻頻，繼之前以轟炸式喺電視、網上同報章發佈六款全新車型嘅廣告之後，喺噚日恆大汽車嘅首款車型－恆馳1 實車相片終於都曝光。

整體嚟講，恆馳1嘅內飾係以「豪華」為設計概念，仿遊艇式嘅雙色配搭，令人感覺好似歐洲車一樣咁高檔。中控台同儀表板採用立體曲面設計，入面鑲有三個液晶顯示屏，旁板再配以大面積包裹嘅皮革，加上全玻璃天幕式車頂，同原廠裝有英國 Meridian 音響系統，都營造出一個高級嘅車廂空間。

而車上嘅多媒體系統，使用中国嘅百度同騰訊嘅雙生態5G互聯技術，所以做到車內購物、車內唱K、無感支付、預約訂票等好似好高科技，但實際又好似無乜用嘅功能。

結構方面，恆馳1擁有 3150mm 軸距，空間有大型房車級數嘅寬敞，後排係兩張以環保皮革包裹獨立行政座椅，擁有18段調節同按摩功能。兩張座椅中間設有杯架、酒架，前座後面亦配備多媒體兩個屏幕，而且仲可以同前排中控台嘅三個屏幕聯動。

根據恆大汽車嘅介紹，呢款恆馳1將會以中国國內嘅純電旗艦D級轎車作定位，並以 Tesla Model S 為直接競爭對手。目前進口版嘅 Tesla Model S喺中国大陸嘅售價由 ¥733,900 起，大家認為中国設計同生產嘅恆馳1又值幾錢呢？

恆馳1將會噝2021年上半年開始測試生產，下半年量產。