Alfa Romeo 車主現身說法 ─ 駕駛保養要訣

仲有幾多人記得「愛快羅密歐」??

香港人對歐洲車嘅認識該是「除了德國以外 (但可能南非製造) 的「2B1A」以外……」,頂多加個 Vi-Dup。

查實德國車唔止呢三、四個牌子,歐洲亦唔止只有德國有造車工業,唔計曾有車主欲控告代理違反商品說明條例嘅某款MPV實際產地嘅西班牙,亦撇開有傳聞將會來港嘅捷克,曾經風靡香港嘅法國兩大品牌,似乎都已被遺忘。意大利嘛? 大多數人只會諗起 法拉利 同 林寶堅尼,頂多加上「想放假…」嘅商用車。相信若非一個星期前某前港姐男友的前大狀「派花生」,相信除咗 Die-hard Fans就無人記得 Alfa Romeo 呢個曾經吒叱1970-80年代香港車壇嘅意大利牌子。

Alfa Romeo 响香港嘅歷史簡述

當年由森那美集團旗下的美輪汽車 (Milan Motors) 代理嘅 Alfa Romeo,普及程度縱不算「街頭街尾必定見到幾架」,也絕非「鬼影都無」。出現過嘅型號款式都係四門/五門房車、雙門轎跑車,例如代理翻譯中文名「千里達」嘅Giulietta (type 116)、「愛快速」嘅Alfasud Sprint。1980年代中後期至千禧年嘅 33、75、90、145、遷就市場需要而改名168嘅164等等,反而開蓬車唔係主力銷售車款。

Alfa Romeo 164 (無換168 徽章)
Photo by: Benny @HK Car Channel

代理權在2000年易手至專營「水貨車」嘅嘉信,但銷量就…..
到2006年,當時已為法拉利及瑪莎拉蒂代理嘅和記行集團接手,但正如文首「抽水」,香港汽車市場嘅「慣性收視」,加上運輸署嚴重架床疊屋嘅驗車制度程序阻礙新車款推售,業績縱算是「翻身」但難復當年勇。

雖然香港車壇對於某「慣性收視」以外嘅品牌總是說三道四「好易壞、無零件、好難整…..(下刪三十字。咁少?講嚟講去三幅屁)」,而又唔知點解意大利車 (唔計天價品牌 while車主唔會計較) 响香港好似有點兒「水土不服」,但總係有一班 Fans 捧場。今次介紹嘅 Alfa Romeo 159 嘅車主 Stephen 正係其中之一。

車主現身說法

呢部 Alfa Romeo 159 係2012年製造 Q2 Sports Plus 版本,配2.2 JTS 引擎,最大馬力182ps/6500rpm,波箱為Selespeed「電子控制自動極力子」6前速。Stephen 响前年買入,價錢…… 「總之唔使搲贊助啦」,「心頭好嘅嘢,只要負擔得嚟,就唔會計較」。

除咗呢部 159 之外,Stephen 目前仲有一部 Fiat 500。「無論响操控表現、駕駛感受、車身線條、內籠嘅設計嗰種美感,基本上日本或德國系嘅車款係俾唔到」Stephen 娓娓道出情傾意大利車嘅原因。

Stephen 以往亦擁有過豐田,「除咗 AE110,之後嗰啲型號根本唔係『無得頂無嘢整』」。佢講返第一次見到部159時,就係被嗰種有如藝術品嘅線條美所吸引。正蠢蠢欲動付訂金之際,周遭朋友都是「意大利車好易壞、無零件、好難整…..」音波功式「勸喻」佢唔好買,但最後還是把心一橫力排眾議。

使用咗接近兩年,Stephen 表示並非不用維修;零件供應雖不是「現眼報」,也並非「等十世都未到」。「最重要係搵啱一個有心機、有技術,清楚知道零件供應渠道嘅車房師傅」。他還指出,即使是坊間嚷著「大把零件」嘅牌子,也並非如快餐店食品「即叫即有」。

他的確曾擔憂「易壞」嘅問題,尤其是電子 Sensor與及波箱。他也明白香港嘅潮濕氣候是電子器材的「天敵」,但故障程度並非外界所「流傳」的。至於波箱,他指出Selespeed 不論在結構、運作原理,都有別於傳統自動波波箱,駕駛習慣必定有所不同,例如加速升檔轉波要達到嘅引擎轉數比日本車或德國車較高;另外要留意住轉數錶而調節油門深度,感覺到車上電腦想轉波就要稍微「縮腳」。

「一承不變沿用一套習慣、模式,不單止你難以適應,連架車都會接受唔到,所謂『易壞』有時候不排除係人嘅因素」

此言或許「得罪」好多人,但筆者就想起N年前第一份旅遊巴司機工作,開工第一日老闆兜口兜面爆SEED 嘅一番說話:

你唔好以為考到牌就叫做識揸車,呢度咁多款車*,要你是但揸一架出去,唔駛 15分鐘就掌握到架車嘅特性,知道要點操控部車,呢啲先叫做真係識揸車

*有乜車?
豐田Coaster (除咗長度有別,引擎都三款)、三菱Rosa、UD RP210、Fuso MM828、Hino RK、MAN 18.310HOCL、KING LONG XMQ6118

總結而言,Alfa Romeo 並非人云亦云嘅「垃圾」,但又確實响駕駛操控、保養維修方面與眾不同,要格外小心注意。

揸Alfa,確實有啲似擁有一幅名畫,懂得欣賞的先至會讚,唔識欣賞定必鬧嘥錢係咁「彈」。但要擁有 Alfa,唔止要學識「欣賞名畫」,仲要記得丟棄「一部通書睇到老」嘅壞習慣。

後記:要(以為)想揸出街人人嘩嘩嘩,係要代價。律師大狀又如何?你識整車咩?唔識就俾錢啦!但有錢唔係大晒。有錢任性叫無品格,(扮)有錢搲著數叫做「乞兒兜搶飯食」賤鳩格。

Be the first to comment

Leave a Reply

Your email address will not be published.


*