平治全新 eActros 600 電動拖頭

全球汽車電動化、電氣化已經成為不可逆轉嘅趨勢。市面上除咗私家車有唔少電動車選擇之外，商用車，特別係重型貨車嘅電動車選擇對比之下的確唔算多。

幾繼SCANIA同富豪分別推出25P同FE兩款純電動重型貨車後，作為德國汽車業龍頭嘅平治，繼現有嘅 eActros 300同 eActros 400 電動貨車後，噚日亦都發佈咗全新純電動拖頭－eActros 600。

外型上，eActros 600 嘅屋仔採用稱為 ProCabin 嘅設計，頭幅可以話最吸引眼球。由於電池驅動無需要使用冷卻引擎咁大嘅水箱，所以白色嘅樣辦車就電上車身同色嘅密封式鬼面罩，中間只留有展示身份嘅平治發光廠徽。屋仔下方兩邊嘅上車踏板設計現代，亦同泵把組件融為一體。而泵把部份就有入風口，為電池及煞車系統提供冷卻之餘，配合車底嘅密封鑲板同車轆嘅軨蓋，亦為整體車身提供良好嘅氣流動態，而從而提高貨車續航里程。

外型好唔好睇就各花入各眼，但係電池性能同續航能力就絕對係電動車不能夠忽視嘅數據。eActros 600 採用嘅鐵磷酸鋰 (LFP) 電池，成份上無鎳同鈷，而壽命長達 120 萬公里。除咗較為環保之外，喺耐用性以及功率流方面具有巨大優勢。再配合兆瓦級充電技術，能夠喺30分鐘內將電池電量由20%充電至80%。而電池充滿後，亦可以為 eActros 600 電動拖頭載重 22 公噸貨物之下提供500公里續航里程。喺數字上嚟睇的確超越同級對手，亦都一改以往電動重型商用車續航距離低嘅觀點。據廠方所指，eActros 600 嘅續航里程已經足夠應付歐洲大約 60% 嘅貨運路線航程距離。