隨著新型冠狀病毒（武漢肺炎）持續喺世界各地大爆發，全球多個國家都採取嚴格防疫政策，要求入境人士喺國境內進行「隔離」。
根據《紐西蘭先驅報》嘅消息，紐西蘭政府已經就今次跨國疫症發出「第4級警報」，所有返回紐西蘭嘅公民都需要「自行隔離」。
只不過咁，就算話紐西蘭「羊多過人」，但總難免有人無適合處所做「自行隔離」…
有見及此，紐西蘭政府除咗準備安排酒店業協助之外，仲喺奧克蘭、惠靈頓、基督城各準備咗上百架露營車，以備畀嗰啲由海外返回紐西蘭而無處自行隔離嘅人使用。
其中喺奧克蘭格林蘭（Greenlane）嘅ASB Showgrounds，停車場已經擺好咗100幾架露營車，硬件準備就緒。
紐西蘭衛生部1位女發言人話：「呢個係『預防措施』一部分，以確保喺4級警報期間返回紐西蘭者能夠履行隔離…員工安全會係首要考慮，員工會接受適當訓練同獲發個人保護裝備。」
至於需要用到呢啲露營車嘅隔離人士，除咗可以靠網上購物補充生活所需，紐西蘭政府會安排膳食供應商提供糧水。
Be the first to comment