2021年11月12號朝早，日本東京發生一宗鐵路平交道車禍。
綜合網民、東京警視廳同埋東急電鐵嘅消息，事發喺當地時間大約朝早8點半，位置係東京都世田谷區奧澤8丁目嘅1個東急大井町線平交道。目擊者指有1架私人的士衝過平交道嘅時候被途經嘅列車撞到車尾，行李廂蓋被撞到彈開，的士之後撞埋平交道旁邊1棟建築物，有居民表示聽到巨響同感到地板震動。
根據推特上嘅影片，可以見到事發後大批警員同埋消防員到場搶救。
東急電鐵表示，涉及今次車禍嘅大井町線列車上面幸好無人受傷，但受車禍影響，自由之丘站同九品佛站之間鐵道被堵塞，大井町線大岡山站同溝之口站之間嘅來回方向列車一度需要全部停駛。
至於被撞嘅的士入面有1名70幾歲嘅的士司機，消息指佢受重傷，要由消防員救出。
東京警視廳嘅交通搜查人員事後到場蒐集證據，調查車禍起因，暫時並無公佈。
今次車禍再次掀起日本網民對年長司機嘅討論，有意見認為日本已經高齡化，唔少老人家自覺老而不廢，年過七旬仍然投身工作貢獻社會，值得敬佩。
但另一邊亦有指老人家從事「揸車」呢種工作，尤其係揸公共運輸車輛，又係咪每個老人家都有足夠能力或者社會有足夠規範確保老人家有能力呢？
香港嘅「的士佬」，市民又對佢哋有幾大信心？
Be the first to comment