【駕駛態度】的士「讓線」突畀油 「非車」避讓要急扭

2020年10月7號下晝1點幾鐘左右,1架醫院管理局旗下「非緊急救護運送服務」嘅豐田Coaster(行內暱稱「非車」),由亞皆老街左轉入嘉齡道後,去到巴富街路口時,1架喺巴富街「讓線」前面停低嘅的士突如其來「畀油」起步,令到揸緊嗰架「非車」嘅司機需要急煞兼扭軚避讓。

不如大家首先睇睇巡邏影片:

又或者「大家可能要將個畫面拉闊啲」:

事發後,「非車」嘅司機同職員因為車上面「有客」,所以睇咗個病人嘅情況先…好不幸「非車」上面其中一名病人報稱頸痛,需要召喚救護車到場,當然交通警察亦到場調查。

以下情節按消息人士提供嘅資料重組(P = 警員、T = 的士司機、N = 「非車」司機):

(P到場)

T(大叫):無撞到!無撞到!睇cam啦!都無撞到!拆我隻cam出嚟睇啦!都無撞過!係N「蛇𠺌」咋嘛!

P:你知唔知咩叫「不小心駕駛」?唔係叫「不小心碰撞」喎!不小心駕駛呢~你唔使撞都係不小心駕駛…你知唔知㗎?

T(串樣):我唔知喎!

P轉身問N:有無cam呀?

N:有呀~(N播返巡邏影片同P一齊睇,P無聲出)

(P睇完片同T傾咗大約30分鐘,P再問N大約事發經過,之後P再同T傾咗大約15分鐘)

P向T講:你自己今晚揳高枕頭諗一諗,係咪真係咁樣?

T(仍然串樣):你釘我牌囉!我都70歲啦!有乜所謂啫?唔好畀我揸囉!扣我分囉!

P(一臉無奈): 釘唔釘你牌唔係我話事…係法官講嘅…你今晚自己諗吓先啦!我之後再約你啦!

T(繼續串樣):你扣分囉!扣晒我分囉!我驚你呀?

P(都係無奈): 你走啦!得喇!走啦!走啦!

(T走咗之後,P先至有機會同N比較正式咁錄取口供)

P向N講:得喇!得喇!你燒定3隻碟畀我啦!我畀定號碼你,你send晒啲資料嚟畀我…我之後會約你…

睇返事發後現場影到嘅相片,涉及事件嘅兩架車基本上真係無碰撞嘅,不過因為「非車」上面有人受傷,所以呢~警方都係需要以「交通意外有人受傷」嘅方向調查

各位睇完上面內容,相信大家都明白到究竟誰是誰非㗎喇 !

(本文部份資料由從事「非緊急救護運送服務」多年、Facebook專頁「非車飛車-非緊急的生活」嘅版主提供,特此鳴謝。)

1 Trackback / Pingback

  1. 【駕駛態度】救護縱分緩與急 阻礙醫護要不得 - 汽車台 HK Car Channel

Leave a Reply

Your email address will not be published.


*