「恒驰汽车」到底係何方神聖?

自今個星期一(2020年8月3號)開始,大家無論喺電視、YouTube、新聞報章嘅廣告同報導,都應該都被「恒驰汽车」、「恒大新能源汽车」呢啲名稱轟炸,令人煩厭嘅程度直頭比 Brian Cha 更甚﹗咁到底呢間「恒驰汽车」到底係乜料,點解突然又咁重本係唔同媒體度落足廣告呢?

首先,要了解「恒驰汽车」就先要知道佢母公司係邊個。「中国恒大集团」喺2019年底宣佈,會在未來三年投資450億人民幣發展「新能源」汽車。並計劃喺今年推出第一款電動車型。而「中国恒大集团」,就係一間由全國政協常委許家印創立,喺中国大陸以發展大型住宅物業為主要業務嘅地產企業。但公司係喺開曼群島註冊而唔係喺中国,總部就設喺深圳。

SAAB 長青型號「9-3」私家車,因為「恒大健康」對車廠嘅收購,變成「恒大新能源汽车集团」旗下嘅型號。

咁「中国恒大集团」係點樣由主要經營地產涉足汽車業嘅呢?主要都係一個字–靠錢(噢,Sor﹗兩個字)

喺舊年六月,「中国恒大集团」旗下嘅「恒大健康」以3.795億美元全面收購前身為瑞典 SAAB(紳寶汽車)嘅電動車生產商–NAVS。而 SAAB 嘅長青型號「9-3」私家車亦都因為咁,變成咗「恒大新能源汽车集团」之下嘅型號。

「恒驰汽车」2020年8月3日發佈會

講返今次嘅大規模宣傳,其實係配合「恒驰汽车」喺8月3號嘅發佈會。喺發佈會上,廠方公關咗六款分別名為「恒馳1」﹑「恒馳2」﹑「恒馳3」﹑「恒馳4」﹑「恒馳5」同「恒馳6」嘅電動車,又指佢哋已經喺電池﹑動力系統﹑整車網嵌﹑銷售服務同智能充電上,建立咗全面嘅產業鏈,配合中國﹑瑞典﹑德國﹑英國﹑荷蘭﹑奧地利﹑意大利﹑日本﹑韓國等國家嘅全球一體化研發模式,希望喺在三至五年內成為世界規模最大﹑實力最強的新能源汽車集團。但講到底,全部都只係靠錢收購返嚟嘅「研發成果」同「希望」。

「恒馳1」,呢個角度睇,無論係Gran Turismo式斜背,定係後排車門車窗設計,都同 KIA Stinger GT 好相似
「恒馳2」,淨係睇圖真係以為自己睇緊 Jaguar XJ 嘅概念車圖片
「恒馳3」,C柱同D柱之間,好有 Lexus RX 影子,而尾燈嘅設計有幾分似 Audi Q5。而張宣傳照都……
「恒馳4」,雖然 TOYOTA Previa 都已經係壽終正寢,但都可以成為模仿對象,佩服﹗
「恒馳5」,唔好以為C柱後面隻窗縮細咗,人哋就唔知你抄 Land Rover Dicovery Sport 先得㗎﹗成條C柱形狀出賣咗你喇﹗
「恒馳6」,本身 BMW X6呢啲咁有特殊品味嘅車款都已經唔靚,但「恒驰汽车」都可以將佢參考變成一部電動車,仲有保時捷式嘅貫穿式尾燈㖭~

講返「恒驰汽车」今次發佈嘅六款新車,聲稱係出自包括 Anders Warming、Michael Robinson、丸山公顧等嘅大師手筆,但係單從官方相片嚟睇,我哋嘅編輯就偏偏覺得由「恒馳1」到「恒馳6」嘅車型,硬係同其他車廠現有嘅型號有相似之處。

中国設計如果要撇走俾人覺得係抄襲嘅感覺,似乎仲有好大段路要走……

呀﹗留意返,「所有車款暫時仲未喺地球發售」﹗

1 Trackback / Pingback

  1. 恆馳終於有部識郁嘅車睇吓﹗ - 汽車台 HK Car Channel

Leave a Reply

Your email address will not be published.


*